Wayang Golek GH3 Budak Buncir (Audio Panggung, 2009) - H. Asep Sunandar Sunarya

Pagelaran wayang golék Giri Harja 3 dina format audio ieu mangrupakeun rékaman audio waktu magelaran di Bojongmanik Kabupaten Lebak Provinsi Banten taun 2009. ============================ SINOPSIS BUDAK BUNCIR Sinigeug. Di Karaton Madukara, Arjuna kadatangan Resi Kombayana atawa Dorna nu cenah diutus ku Raja Astina, Duryudana. Maksud nepungan Arjuna téh minangkana mah ngayakeun “rékonsiliasi” (daméy) antara Pandawa jeung Kurawa nu geus lila dina pacogrégan, mumusuhan, hayoh wé silih arah pati. Rékonsiliasi éta antara Pandawa jeung Kurawa kudu bébésanan. Gatotkaca kudu dikawinkeun jeung putri Duryudana, Déwi Lesmining Puri. Tapi tawaran ieu ditampik ku Gatotkaca. Alesanana, Gatotkaca téh can aya sir pikeun rumah-tangga. Arjuna jeung Resi Dorna keukeuh maksa ka Gatotkaca kudu nurut kahayang kolot. Kusabab keukeuh embung, Arjuna ngancam Gatotkaca rék dipaéhan. Malah Semar Badranaya nu ngahalangan Arjuna supaya ulah mergasa Gatotkaca, kalah diciduhan ku Arjuna. Sikep Arjuna kitu alatan dipangaruhan ku Dorna. Waktu Semar rék ditubles ku badama Arjuna, Semar ngaleungit, kitu deui Gatotkaca kabur ti karaton Madukara. Lalampahan Gatotkaca ahirna anjog ka hiji patapaan Tutugan Gunung Parasu (kadang dalang nyebut Rotawu) nu diadegkeun ku Pandita Merakaca. Di patapaan éta, Gatotkaca hayang maguron ka Pandita Merakaca. Gatotkaca disarankeun supaya miluan sayémbara di Karajaan Tirta Dahana pikeun meunangkeun Putri Dahana Wati. Tapi saméméhna, Gatotkaca kudu salin jinis heula jadi jalma nu goréng patut, nu katelah Budak Buncir. Carios salajengna mangga bandungan dugi ka réngsé. Cag!