KIGOMA YAPATA KIWANDA CHA KUKAUSHA DAGAA, HASARA YA UVUVI KUPUNGUA KWA ASILIMIA 40.

Serikali mkoani Kigoma kwa kushirikiana na Shirika la Chakula na Kilimo la Umoja wa Mataifa (FAO) imekamilisha ujenzi wa kiwanda cha kukausha dagaa na kutengeneza barafu kwa ajili ya kuhifadhi samaki, hatua inayotarajiwa kuokoa zaidi ya asilimia 40 ya mazao ya uvuvi yanayoharibika kila mwaka. Mradi huo unalenga kupunguza hasara kubwa iliyokuwa ikiwakumba wavuvi kutokana na ukosefu wa teknolojia za kisasa za kukausha na kuhifadhi samaki na dagaa, hasa kipindi cha mvua. Akizungumza wakati wa hafla fupi ya kukabidhi kiwanda hicho kwa serikali katika mwalo wa Katonga, Manispaa ya Kigoma Ujiji, Naibu Katibu Mkuu wa Wizara ya Mifugo na Uvuvi, Profesa Mohammed Sheikh, akiwa pamoja na Katibu Tawala Mkoa wa Kigoma, Hassan Rungwa, wamesema kuwa mradi huo ni hatua muhimu katika kuimarisha sekta ya uvuvi na kuinua uchumi wa wavuvi. Wameeleza kuwa kupatikana kwa miundombinu hiyo kutasaidia kuongeza thamani ya mazao ya uvuvi, kuboresha ubora wa samaki na dagaa pamoja na kufungua fursa za masoko ya ndani na nje ya nchi. Kwa upande wao, wachakataji wa dagaa na samaki mkoani humo wameipongeza Serikali ya Jamhuri ya Muungano wa Tanzania kwa kutekeleza mradi huo, wakisema utawasaidia kupunguza hasara na kuongeza kipato chao. Wameeleza kuwa awali walikuwa wakikumbwa na changamoto kubwa ya uhifadhi wa mazao yao, hali iliyosababisha baadhi ya samaki na dagaa kuharibika kabla ya kufika sokoni, lakini sasa matumaini yao yameongezeka kufuatia kukamilika kwa kiwanda hicho.