Ay Zama Watana | Ghani Khan | Sardar Ali Takkar | اې زما وطنه | غني خان | سردارعلي ټکر

شاعر: غنی خان سندربول: سردار علي ټکر ـــــــــــ که خازې شنې مې په قبر وي ولاړې که غلام مړ وم راځئ توکړئ پرې لاړې که په خپلو وينو نه وم لمبېدلی په ما مه پليتوئ د جومات غاړې چې قطرې قطرې مې پوځ د دښمن نه کا مورې ما پسې په کوم مخ به ته ژاړې يا به دا بې ننګه ملک باغ عدن کړم يا به کړم د پښتنو کوڅې ويجاړې اې زما وطنه، د لالونو خزانې زما ستا هره دره کې دي د تورې نښانې زما سترګې مې قربان شه ستا د خاورو د کورونو نه عقل مې ايرې شه ستا د پاره د فکرونو نه ځار شمه، قربان شم ستا د غرونو د سيندونو نه ستا هره دره کې دي د تورو نښانې زما اې زما وطنه، د لالونو خزانې زما زه يم ستا د خاورو ته زما د مينې جوړ يې ته مې د غيرت او د پښتو رنګينې جوړ يې ته مې د نيکه او د بابا د وينې جوړ يې ستا زړه کې ويدې دي ټولې تلې زمانې زما اې زما وطنه د لالونو خزانې زما ستا هره دره کې دي د تورو نښانې زما ستا عزت چې نه وي زه به نوم او عزت څه کړمه ته چې خوار و زار يې زه به خوب او راحت څه کړمه ستا سر چې وي ټيټ نو زه به شان او شوکت څه کړمه مسته به دې خاوره کړم په وينې مستانې زما اې زما وطنه د لالونو خزانې زما ستا هره دره کې دي د تورو نښانې زما يا به دې زه سيال کړمه وطنه د جهان يا به ستا په پښو کې تورې خاورې کړم خپل ځان زه به دړې وړې شم خو تا به کړم ودان نر يمه پښتون يم تا ته يادې افسانې زما اې زما وطنه د لالونو خزانې زما ستا هره دره کې دي د تورو نښانې زما