Bachadon boʼyni fon va rak oldi kasalliklari diagnostikasi va davolashning zamonaviy jihatlari

Bachadon bo’yni fon va rak oldi kasalliklari ginekologik kasalliklar orasida yetakchi o’rinlardan birini egallab, bachadon bo’yni rak kasalligi xavfini keltirib chiqaradi. Hozirgi vaqtda jahonda bachadon bo’yni rak kasalligi onkologik xastaliklar strukturasida 5-o’rinni, ayol jinsiy a’zolari yomon sifatli o’smalari orasida 1-o’rinni egallaydi. Onkologik kasalliklar natijasida ayollar o’limi sabablari orasida bachadon bo’yni rak kasalligi 2-o’rinda turadi. Bachadon bo’yni raki bilan kasallanish 45-55 yoshdagi ayollar orasida avj olgan bo’lishiga qaramasdan, so’nggi yillarda 30 yoshgacha bo’lgan ayollar orasida ham bu kasallik ko’p uchramoqda. Bachadon bo’yni raki erta diagnostikasi va profilaktikasida bachadon bo’yni fon va rak oldi kasalliklarini aniqlab, oqilona olib borish, ushbu kasallikalrni tizimli ommaviy profilaktik ko’riklar orqali aniqlash muhim ahamiyat kasb etadi.