Алмат, Өркен Асановтар "Әнші болғым келеді" хабары 2002 ж "Асыл әжем" әні. Е.Шакеев сөзі.А.Асылбек

"Әнші болғым келеді" телевизиялық байқауымның алғашқы хабарлары. Әлі жарнамасы аздау болғандықтан, эфирге шығатын бала саны жетіспей қалады. Сондай кездері, өзімнің ұлдарым запаста тұратын. Түсірілімге бір күн қалғанда, әнді тез үйретіп, үміткерлер қатарына қосып жіберетінмін. Содан, қызық болғанда, қазылар алқасы Алмат пен Өркенге жақсы орындады деп, "бірінші орын" береміз деп кеңесіп жатқан сөздерін естіп қалып, "ойбай, бұл балалар орын алмасын " деп жетіп барғанмын ғой қастарына. Сөйтсем, Жеңіс аға ашуланып, "Сен мүлдем араласпаймын дегенсің, не деп тұрсың енді",-деді. Мен "Ия, бәрі әділ болуы керек, менің де көздегенім сол, бірақ бұлар орынға ілікпесін, өйткені, олар менің өзімнің ұлдарым дегенмін ғой. "Немене, бұл балалар, сенің ұлдарың болғаны үшін кінәлі ме, алады, негізінде "Бас жүлде" бергіміз келген, бірақ сахналық киімдері жағынан ұтылып тұр. Мектеп формасымен келіпті" демей ме?! Сөйтіп, "запастағы сарбаздарым" бірінші орын алып кеткені. Шағын мейрамханананың бір бұрышында түсірілетін әр хабарымды "Гала концерттей" көріп, бірінен қалмай әкем мен анам әрдайым қолдауларын көрсетіп түсірілім алаңынан табылатын.