ጥቡዕ ልቡ ለሕፃን መዝሙር (አቡን) ዘሐምሌ ቂርቆስ

አቡን ፡ በ፬ ጥቡዕ ልቡ ለሕፃን ጥቡዕ ልቡ ለሕፃን እንዘ ሀሎ ውስተ ምኲናን ጥቡዕ ልቡ ለሕፃን ይቤላ ሕፃን ለእሙ ጥብዒኬ እም ንፈጽም ገድለነ ወስምዓነ ጥ፥ ንፈጽም ገድለነ ወስምዓነ ከመ ንርአይ ገጾ ለአምላክነ ጥ፥ ይቤሎ ሕፃን ለእግዚኡ ዘመጠነዝ ገድለ ተጋዲልየ ምንተኑ ተአሥየኒ ጥ፥ ይቤሎ እግዚኡ ለሕፃን አአሥየከ ዘሀሎ ውስተ ልብከ ጥ፥ ይቤሎ ሕፃን ለእግዚኡ ኢትቅብር ሥጋየ ዲበ ምድር ጥ፥ ይቤሎ እግዚኡ ለሕፃን አልቦ ዘየዓብየከ በመንግሥተ ሰማያት ዘእንበለ ዮሐንስ መጥምቅ ወአነ ፈጣሪከ ወዓዲ ከመ ኢይማስን ሥጋከ ዲበ ሠረገላ ኤልያስ ህየ አነብረከ። ዓራ፣ ጸርሐ ሕፃን ኀበ እግዚኡ እንዘ ይብል ዘመጠነዝ ገድለ ተጋዲልየ ምንተኑ ተአሥየኒ አዓሥየከ ዘሀሎ ውስተ ልብከ ዘሐነፀ መርጡለከ ወገብረ ተዝካረከ ኢየኃጒል በኀቤየ ወበኀቤከ ወዓዲ ከመ ኢይማስን ሥጋከ ዲበ ሠረገላ ኤልያስ ህየ አነብረከ። ቅ፣ ነቅዓ ጥበብ ያበርህ ሎሙ ለሰማዕት እለ ተወከሉ በዕፀ መስቀሉ በውስተ ሥን ጥቡዓነ ኩኑ። ሰላም፣ ሕፃን ንዑስ ኢፈርሐ ትእዛዘ ንጉሥ ወጸንዓ በመንፈስ ቅዱስ በሰላም ዓደወ መንግሥተ ክብር ወረሰ።