Ана догасы

Татар кешесенә бу сүз балачактан колагына гына түгел, гамәлләренә дә сеңдерелгән. Хәтерлисездер?📌 Әби-бабаларыбыз кылган кайбер гамәлебезгә бәйле ризасызлык белдергәндә: "Иии, нинди бисмилласыз бала булдың соң?" - диләр иде. Табынга утыргач: "Бисмиллаңны әйт, тамагың туймас", - дип алдан кисәтү ясый торганнар иде. Берәр юлга чыга башласак та, ишек тупсасын "Бисмилла"сыз атламаска алар өйрәттеләр. ________________________________________________________________________ Нинди сүз соң ул Бисмилла? Бисмилланың гарәпчәдән мәгънәсе - Аллаһының исеме белән дигән сүз. Мөселманнар телендә берәр эш башлаганда, авыр хәлдә калганда, зәгыйфьләнгәндә, төрле хәвефле ситуацияләр алдында калганда, ярдәм сораганда даими әйтелә торган сүз. Бисмилла сүзендә Аллаһының бөтен атрибутлары бергә җыелган. Моны да Аллаһ кешегә җиңеллек өчен эшләгән - шулай әйткәндә без аның 99 исемен дә күз алдында тотабыз. Аның көч-куәте хакында Хәдистә менә ничек әйтелә: “Әгәр бөтен агачлар каләм булса, бөтен диңгезләр язу карасы булса һәм фәрештәләр, җеннәр, кешеләр бер җиргә җыелып, бисмилланың мәгънәсен аңлатып язарга теләсәләр, уннан берен дә яза алмаслар". ––––––––––––––––––––––––––––––––––––––––––––– Бу сүз татарның канында дими ни дисең! "Бисмилла дип башладым, Бу бәетнең башларын". Барлык бәетләргә дә хас башлам бу дисәк тә хаталанмыйбыздыр. Әкиятләребездә дә Бисмилла геройны төрле кыенлыклардан коткару чарасы буларак чыгыш ясый. Мәсәлән, "Патша углы" әсәрендә герой - бер атаның өченче углы, Каракошка атланып, океанның аръягына чыкканнан соң, бер йортка юлыга һәм аның ишегенә кыстырылган "Бисмилла әйтеп, менә бу ачкыч белән йозакны ачыгыз" дигән хат таба. Шулай эшли һәм йорт эчендә төрле тәгамнәр, йоклар өчен җайлы ятак табып, хәл җыеп сәяхәтен дәвам итә ала.