မြဝတီ​တောင်ဘက်မှာ စစ်တပ်စစ်​ကြောင်းတခုလုံး ချေမှုန်းခံရ | People's Spring

မြဝတီ​တောင်ဘက်မှာ စစ်တပ်စစ်​ကြောင်းတခုလုံး ချေမှုန်းခံရ ဇူလိုင်-၁၇၊ ၂၀၂၆။ People’s Spring လေးကေ့ကော်မြို့သစ်အနောက်ဘက်နားက ရဲကုန်းနေရာကို စစ်တပ်စစ်​​ကြောင်းဝင်ရောက်လာချိန်မှာ တော်လှန်ရေးတပ်တွေက တိုက်ခိုက်ခဲ့ပြီး အမှတ်(၁၃)စစ်ဆင်ရေးကွပ်ကဲမှုဌာနချုပ် (စကခ-၁၃)လက်အောက်ခံ စစ်​ကြောင်းတစ်ကြောင်းလုံးနီးပါး သေဆုံးခဲ့တယ်လို့ ကရင်စစ်ရေးသတင်းရင်းမြစ်တွေက ပြောပါတယ်။ ကရင်ပြည်နယ်၊​ မြဝတီမြို့တောင်ဘက်က ရဲကုန်းနေရာကို ကော်ဘရာစစ်ကြောင်းစစ်ဆင်ရေးမှူး ဗိုလ်မှူးဒါဘောဦးဆောင်တဲ့ တော်လှန်ရေးတပ်တွေ ဆုတ်ခွာပေးလိုက်ပြီးနောက် စစ်တပ်စစ်ကြောင်းအခုလို ချေမှုန်းခံရတာလို့ သိရပါတယ်။ ဇူလိုင် ၁၆ရက် မနေ့က နေ့လယ် ၁၂နာရီလောက်မှာ စကခ (၁၃)လက်​အောက်ခံ ခမရ(၅၅၆)တပ်ရင်း ဒုတပ်ရင်းမှူး ဗိုလ်မှူးတင်ကို ဦးစီးတဲ့ စစ်ကြောင်းကို တော်လှန်ရေးတပ်တွေက တိုက်ခိုက်ခဲ့ရာမှာ ဗိုလ်မှူးတင်ကို အပါအဝင် စစ်ကြောင်းတစ်ခုလုံးနီးပါး သေဆုံးခဲ့​ပြီး စစ်သုံ့ပန်းအချို့ကိုလည်း ဖမ်းမိခဲ့တယ်လို့ စစ်ရေးသတင်းရင်းမြစ်တွေက ပြောပါတယ်။ လက်နက်ခဲယမ်း​တွေလည်း သိမ်းဆည်းရရှိခဲ့ပါတယ်။ ဒါ့အပြင် စစ်တပ်ဘက်က စစ်ကူတိုက်ပေးတဲ့ BGF ခွဲထွက် ဗိုလ်မုတ်သုန်အဖွဲ့က တပ်ခွဲမှူး ၁ဦး၊ DKBA ခွဲထွက် ဗိုလ်ဘိအဖွဲ့က တပ်သားတွေလည်း သေဆုံးတယ်လို့ ကရင်စစ်ရေးသတင်းရင်းမြစ်တွေက ပြောပါတယ်။ ဇူလိုင် ၁၆ ရက် နေ့လယ် ၁၂နာရီလောက်က ရဲကုန်းနေရာ အကျော်မှာ တိုက်ပွဲပြင်းထန်ခဲ့တာလို့ သိရပါတယ်။ အဲဒီတိုက်ပွဲအတွင်း စစ်သုံ့ပန်း ၄ ဦးကိုလည်း ဖမ်းမိပြီး လက်နက်ခဲယမ်းတွေကိုလည်း ဗိုလ်မှူးဒါဘောဦးဆောင်တဲ့ တော်လှန်ရေးတပ်ဖွဲ့တွေက သိမ်းရခဲ့တယ်လို့ ကရင်စစ်ရေးသတင်းရင်းမြစ်တွေက ပြောပါတယ်။ စစ်သုံ့ပန်း ၄ ဦးစလုံးဟာ စစ်တပ်က အဓမ္မစု​ဆောင်းထားတဲ့ စစ်မှုထမ်းသင်တန်းဆင်း ပြည်သူ့စစ် တပ်သား ​လေးဦးဖြစ်ပါတယ်။ စစ်တပ်ဟာ မနေ့ကလည်း ဂျက်ဖိုက်တာ၊ Y12 တွေနဲ့ အဆက်အပြတ် ဗုံးလာကြဲခဲ့တယ်လို့ ကရင်စစ်ရေးသတင်းရင်းမြစ်တွေက ပြောပါတယ်။ ဇူလိုင် ၇ရက် ညနေပိုင်းလောက်ကစတဲ့ မြဝတီမြို့တောင်ဘက်ခြမ်းက ဖလူးနဲ့ မင်းလက်ပံဒေသ တကျော့ပြန်တိုက်ပွဲမှာ စစ်တပ်ဘက်က သေဆုံးသူနဲ့ ဒဏ်ရာရသူတွေ ရှိနေတယ်လို့ သိရပါတယ်။ ===== မန္တလေးမှာ ကျူးကျော်ဆိုပြီး ဖျက်သိမ်းထားတဲ့မြေနေရာကို စစ်တပ် ပြန်ရောင်း ဇူလိုင်-၁၇၊ ၂၀၂၆။ People's Spring မန္တလေးမြို့က ပြည်သူတွေရဲ့ နေအိမ်နေရာကို ကျူးကျော်ဆိုပြီး ဘူဒိူဇာနဲ့ထိုး သိမ်းယူခဲ့တဲ့ မြေနေရာတွေကို စစ်တပ်က ဂရမ်မြေချပြီး ပြန်လည် ရောင်းစားနေတာမှာ ပေ၄၀×၆၀ တစ်ကွက်ကို ကျပ်သိန်း၂၀,၀၀၀ အနိမ့်ဆုံး ဈေးပေါက်နေတယ်လို့ အိမ်ခြံမြေပွဲစားတွေက ပြောပါတယ်။ မန္တလေးမြို့၊ ပြည်ကြီးတံခွန်မြို့နယ် ၁၂၈ လမ်း-၄၈ လမ်းပတ်ဝန်းကျင်က ငွေတော်ကျီကုန်း၊ သင်ပန်းကုန်း နဲ့ ဇီးအုပ်ရပ်ကွက်တွေကို ကျူးကျော်ဆိုပြီး စစ်တပ်က လူမိုက်အုပ်စုတွေငှားကာ အာဏာသိမ်းပြီးကတည်းက ဆက်တိုက် ဖျက်ဆီး သိမ်းယူခဲ့ကြတာပါ။ အဲဒီနောက် သိမ်းယူထားတဲ့ မြေနေရာတွေကို အကွက်ရိုက်ကာ နှစ် ၃၀ ဂရမ်ချပေးပြီးနောက် ကျဆုံးစစ်သည်အိမ်ယာ စတင်ဆောက်လုပ်ခဲ့တယ်လို့ သိရပါတယ်။ ကျဆုံးအရာရှိတွေကိုလည်း အဲဒီမြေနေရာတွေ ပေးခဲ့တာလို့ အိမ်ခြံမြေပွဲစားတွေက ပြောပါတယ်။ အဲဒီနေရာမှာ ပေ၄၀×၆၀ ကွက်ကို ကျပ်သိန်း ၂၀,၀၀၀ ကနေ ၃၅,၀၀၀အထိ ရောင်းချနေတာ တွေ့ရပြီး မန္တလေးမြို့က VIP နေရာဆိုပြီး နာမည်ကြီးတယ်လို့ ဆိုပါတယ်။ အဲဒီရပ်ကွက်မှာ လမ်းကြားထဲကျတဲ့ မြေကွက်ဟာ ကျပ်သိန်း ၁၀,၀၀၀ အထိ ဈေးပေါက်တယ်လို့ သိရပါတယ်။ ၂၀၂၃ခုနှစ်က နေအိမ်ဖျက်ဆီးခံခဲ့ရသူ အမျိုးသမီးတစ်ဦးကတော့ သူတို့ရဲ့ ချွေးနည်းစာလေးတွေနဲ့ စုဆောင်းဝယ်ယူထားတဲ့ မြေကွက်လေးတွေကို လုပ်ရက်လိုက်ကြတာလို့ ပြောပါတယ်။ အရင်က မန္တလေးမြို့မှာ ထန်းကိုးပင်၊ ရဲမွန်တောင် နဲ့ ဗိုလ်ချုပ်ရွာတို့ဟာ ဈေးအမြင့်ဆုံးရပ်ကွက်တွေဖြစ်ပြီး အခု မြို့ပြင်နေရာဟာ ဒုတိယရဲမွန်တောင်ဆိုပြီး နာမည်ကြီးနေတာလို့ ပွဲစားတစ်ဦးက ပြောပါတယ်။ ဒီမြေနေရာအကွက်ရိုက်ရောင်းချမှုတွေကိုလည်း စစ်ဗိုလ်ချုပ်တွေရဲ့ မိသားစုဝင်နဲ့ ပတ်သက်သူ ပွဲစားတွေကပဲ အများစု ချုပ်ကိုင်ထားတယ်လို့ ဆိုပါတယ်။ စစ်တပ်ရဲ့ သေဆုံး စစ်သားဇနီးသည်တွေဟာလည်း နေအိမ်မရလို့ဆိုပြီး တပ်တွင်းတိုင်ကြားမှုတွေရှိတယ်လို့ လူမှုကွန်ရက်မှာ ပြောဆိုထားတာ တွေ့ရပါတယ်။ စစ်တပ်အရာရှိအကြီးပိုင်းတွေက သေဆုံးအရာရှိ‌တွေရဲ့နာမည်သုံး မြေကွက်တွေ အစားယူပြီး ရောင်းချတာတွေလည်းရှိနေပါတယ်။ အစားထိုးအိမ်ယာကိုတော့ တိုက်ခန်းတွေမှာ စစ်သားမိသားစုတချို့ပဲ ရတယ်လို့ စစ်သားဇနီးတွေက TikTokမှာ ပြောဆိုထားကြတာကိုလည်း တွေ့ရပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #Myanmar #Myawaddy #Resistance #MilitaryNews #BreakingNews #KarenState #မြန်မာ #မြဝတီ #စစ်ရေးသတင်း #နောက်ဆုံးရသတင်း #တော်လှန်ရေး #မြန်မာ့သတင်း #Myanmar #Mandalay #MilitaryJunta #LandGrab #HumanRights #BreakingNews #မြန်မာ #မန္တလေး #စစ်ကောင်စီ #မြေသိမ်းဆည်းမှု #မန္တလေးသတင်း #နောက်ဆုံးရသတင်း