ប្រវត្តិអ្នកឧកញ៉ា គិត ម៉េង និងរបៀបដែលគាត់កសាងអាណាចក្រជំនួញធំជាងគេនៅស្រុកខ្មែរ | Full Story(1-3)

ត្រឡប់ទៅកាលពី៥៥ឆ្នាំមុន ពោលក្នុងឆ្នាំ១៩៦៨ លោកគិត ម៉េងបានកើតក្នុងគ្រួសារពាណិជ្ជករ និងភតិបតីដើមកំណើតចិនមួយនៅក្នុងខេត្តកណ្ដាល។ ថ្វីបើជាសំណាងបានកើតក្នុងគ្រួសារធូរធារ ក៏ប៉ុន្តែដំណើរជីវិតក្នុងវ័យកុមារដល់វ័យជំទង់របស់គាត់ គឺពុំល្អប្រសើរឡើយ។ គាត់បានឆ្លងកាត់សម័យកាលងងឹត ពលពត ឪពុកម្ដាយរបស់គាត់បានស្លាប់ក្នុងរបបនោះ ហើយនៅពេលខ្មែរក្រហមដួលរលំគាត់បានព្រាត់បងប្អូនរសាត់អណ្ដែតដល់ស្រុកថៃក្នុងអាយុ១១ឆ្នាំ និងក្រោយមកត្រូវបានបងប្រុសរបស់គាត់រកឃើញនៅក្នុងជំរុំភៀសខ្លួនលើទឹកដីថៃ រួចក៏បាននាំយកទៅរស់នៅប្រទេសអូស្ត្រាលី។ រស់នៅ និងចូលរៀននៅក្រុងបេរ៉ាក្នុងនាមជាជនភៀសខ្លួន ជាក្មេងប្រុសខ្មែរមានរូបរាងស្គម មិនទាន់ចេះភាសាអង់គ្លេស ដំណើរជីវិតរបស់គាត់នៅទីនោះក៏នៅតែមិនទាន់គាប់ប្រសើរប៉ុន្មានដែរ ទម្រាំរៀនដល់ថ្នាក់មហាវិទ្យាល័យ។ វិលត្រឡប់ពីអូស្ត្រាលីមកកាន់ទឹកដីកំណើតវិញក្នុងអាយុ២៣ឆ្នាំ។ មុនកសាងបានអាណាចក្រជំនួញដ៏មានឥទ្ធិពលដូចបច្ចុប្បន្ន ដំបូងឡើយគាត់ពុំមានអ្វីច្រើនទេសម្រាប់យកទៅធ្វើដើមទុនរកស៊ីទេ ប៉ុន្តែគាត់គឺជាមនុស្សម្នាក់ដែលមានចក្ខុវិស័យត្រូវចំពោះអនាគតកម្ពុជា និងចេះប្រើប្រាស់ភាពឆ្លាតវៃនៅក្នុងពេលវេលាដ៏ត្រឹមត្រូវ ដើម្បីបង្កើត និងក្រសោបយកឱកាសធំៗបានច្រើនជាងមនុស្សដទៃទៀត។ គាត់គឺជាមនុស្សដែលជឿយ៉ាងខ្លាំងលើការតស៊ូព្យាយាម និងញៀនក្នុងការចាប់យកឱកាស។ ពាក្យមួយឃ្លាដ៏ល្បីដែលគាត់បានសរសេរលើទំព័របណ្ដាញសង្គមផ្លូវការនាពេលថ្មីៗនេះគឺ “ពេលណាអ្នកកាន់តែប្រឹងប្រែង ផ្កាយសំណាងរបស់អ្នកនឹងកាន់តែភ្លឺ”។ តើអ្នកគិតថាឥឡូវគាត់កំពុងស្ថិតនៅចំណុចណា ប្រសិនបើកាលពីឆ្នាំ១៩៩១ លោក គិត ម៉េង សម្រេចចិត្តមិនមកកម្ពុជាវិញ? _______________________________ #poipetinsider #cambodia #business #businesstales #millionairemindset #businessstrategy #investment #money #richlifestyle #NeakOknhaKithMeng #royalgroup #សេដ្ឋី #ក្រុមហ៊ុនធំជាងគេនៅកម្ពុជា #សាជីវកម្មគ្រួសារ #ជំនួញ #ចេញរកស៊ី