KONGAMANO LA VIJANA MBULU LAWAPA MAFUNZO YA URAIA, TEKNOLOJIA NA UZALENDO

Halmashauri ya Mji wa Mbulu imeandaa kongamano maalum la vijana lililofanyika Julai 13, 2026, likiwakutanisha mamia ya vijana kutoka maeneo mbalimbali ya wilaya hiyo kwa lengo la kujadili masuala yanayowahusu na kuwajengea uwezo katika nyanja tofauti za maendeleo. Kongamano hilo lilishuhudia mwitikio mkubwa wa vijana waliojitokeza kwa wingi kushiriki mafunzo na mijadala mbalimbali inayolenga kuimarisha ushiriki wao katika maendeleo ya jamii na taifa. Akizungumza katika kongamano hilo, Mratibu wa Kongamano la Vijana wa Halmashauri ya Mji wa Mbulu, Dkt. Tomic Simbeye, alisema jukwaa la Vijana Platform limeanzishwa ili kuwapa vijana nafasi ya kusikilizwa, kujadili changamoto zinazowakabili na kushiriki katika kutafuta suluhisho la matatizo yao. Alieleza kuwa jukwaa hilo tayari limezinduliwa kitaifa na kwamba Mbulu inaendeleza utekelezaji wake kabla ya uzinduzi rasmi utakaoongozwa na Kiongozi wa Mbio za Mwenge wa Uhuru. Dkt. Simbeye alisema katika kipindi cha kongamano hilo la siku mbili, vijana wanapatiwa elimu ya uraia, uzalendo, maadili mema, pamoja na elimu kuhusu ukatili wa kijinsia. Aidha, wanajifunza matumizi sahihi ya teknolojia za kisasa hususan Akili Mnemba (AI), pamoja na namna ya kuzitumia teknolojia hizo kujiongezea fursa za ajira na kujikwamua kiuchumi kupitia ubunifu na ujasiriamali. Aliongeza kuwa lengo kuu la kongamano hilo ni kuhamasisha amani, mshikamano na uwajibikaji miongoni mwa vijana huku akiwapongeza Mkuu wa Wilaya ya Mbulu, Mhe. Mikeson Mdoe, na Mkurugenzi wa Halmashauri ya Mji wa Mbulu, Rehema Bwase, kwa mchango wao mkubwa katika kuwawezesha vijana. Pia aliipongeza Mbulu kwa kuendelea kufanya vizuri katika sekta ya elimu na maendeleo ya vijana, hali inayoiweka miongoni mwa maeneo yanayoongoza katika Mkoa wa Manyara.