İlham Nəzərovun təqdimatında "Arif Məlikovun izi ilə..." adlı konsert proqramı

“Arif Məlikovun izi ilə...” adlı konsert proqramı 13 may 2026-cı il tarixində Azərbaycan Milli İncəsənət Muzeyi məkanında təqdim edildi. Layihə görkəmli Azərbaycan bəstəkarı Arif Məlikovun yaradıcılığına həsr olunaraq milli vokal sənətinin poetik və emosional çalarlarını bir səhnədə birləşdirdi. Konsertin ideya müəllifi və təşkilatçısı İlham Nəzərov proqramı musiqi-estetik baxımdan vahid dramaturji xətt üzərində qurmuşdu. Konsert proqramında Arif Məlikovun Bu dünyada ne çok güzel kadın var, Sen yoktun, Çınar olsam, Dün gece rüyama girdin, Sen, Yumulu göz kapaklarımın içindesin və Əsir Azərbaycanım kimi əsərləri xüsusi yer tuturdu. Bununla yanaşı proqramda Arzu Məmmədovanın “Qaranlıqda bir şam yanır”, Ceyhun Allahverdiyevin “Dəniz və səma”, Lalə Cəfərovanın "Bu gecə", Kəmalə Əlizadənin “O patria Mia”, Elza Seyidcahanın “Müəllimim”, Tamilla Əhədovanın “Sənsiz”, Pikə Axundovanın “Necədir?” və Vüsal Namazlının “Ancaq” adlı əsərləri də təqdim edildi. Konsertin musiqi müşayiətində Anna Rasina və Daniil Kirillov kimi peşəkar piano ifaçıları iştirak edərək proqramın yüksək bədii səviyyəsini daha da artırdılar. İfa olunan romanslarda lirizm, fəlsəfi düşüncə və emosional dərinlik fortepiano və vokal ansamblının harmoniyası vasitəsilə tamaşaçıya çatdırıldı. “Arif Məlikovun izi ilə...” layihəsi Azərbaycan vokal musiqisinin müxtəlif üslub və nəsillərini bir araya gətirən yaradıcı sənət platforması kimi dinləyicilər tərəfindən böyük maraqla qarşılandı.