KWA MKAPA KAMA WEMBLEY, UKARABATI WAKE WAFIKIA ASILIMIA 80

Kazi ya ukarabati wa Uwanja wa Benjamin Mkapa, Dar es Salaam imeendelea kwa kasi na hadi sasa imefikia asilimia 80 ya utekelezaji, ikiwa ni sehemu ya juhudi za serikali kuboresha miundombinu ya michezo nchini. Akizungumza uwanjani hapo leo Ijumaa Aprili 25, 20205, Kaimu Mkurugenzi wa Maendeleo ya Michezo, Boniface Tamba, amesema kazi kubwa imekamilika, ikiwemo kubadilisha viti vyote 62,000 na kuviweka vipya vya kisasa vinavyowakilisha rangi za bendera ya Taifa – kijani, njano, nyeusi na bluu – kama alama ya uzalendo na mshikamano wa kitaifa. “Lengo ni kuhakikisha uwanja huu unakuwa wa kisasa, unaokidhi viwango vya kimataifa, na tayari kwa mashindano makubwa ya kitaifa na kimataifa,” amesema Tamba. Aidha, maboresho ya mfumo wa umeme na taa yamekamilika kwa kiwango kikubwa, ambapo taa mpya za kisasa zilizowekwa zinakidhi viwango vya FIFA, jambo litakalowezesha uwanja huo kuwa mwenyeji wa mechi za kimataifa na hafla mbalimbali zenye hadhi ya juu.