Miudiño Sessions #17 - Loita Amada

Décimoséptima entrega das Miudiño Sessions, un proxecto non comercial de difusión da nosa cultura, feito dende a paixón pola música e a lingua que máis alá da promoción de novas propostas tamén ten un certo propósito arquivístico, facendo a foto fixa do momento histórico que estamos a viver, por número e por calidade, de proxectos musicais na nosa lingua. Desta volta as cámaras d'A Regueifa Plataforma viaxaron até A Estrada para filmar a Loita Amada, o proxecto liderado por Pablo Carracedo "Jasper" (Xenreira, Nao, A Matraca Perversa...) e Nébeda Piñeiro (Cantometrics) que comezou a súa andaina a finais do pasado ano. A carón da lareira familiar ecoou na pedra "Un anaco de min", unha das pezas máis emocionantes do seu primeiro disco, e unha moi persoal adaptación dunha das gravacións que fixo Alan Lomax no País hai setenta anos e levada, coma non podía ser doutro xeito, a coordenadas revolucionarias. Loita Amada atopanse agora mesmo a preparar o que será o seu segundo disco, un traballo que gravarán en terras bascas con Kaki Arkarazo aos controis e que verá a luz en 2024. https://www.loitaamada.com/ Voz e guitarra: Pablo Carracedo "Jasper" Voz e pandeiro: Nébeda Piñeiro Baixo: Iván Bernárdez Guitarra: Iván Barreiro Teclados: Iria Iglesias Trompeta: María Prado Trombón: Xiana Naval Batería: Kinhos Saburido