Nceninapeşeni Sataple Vikter Lazuri Birapa(Lazca&Türkçe ALTYAZILI) Laz Şair Rıfat Akatin destanı

(Alt yazı seçeneğini aktifleştirin, Lazca&Türkçe altyazılı) Nceninapeşeni Sataple vikter Dovimbari mati mişǩun cevikter Domanç̌inen va malasi govikter Feleği momit̆u mot̆eri vikter Ma hay maxeneni zabuni ǩoçi? Moy movit̆i, va maxenen do oçi!? Sum t̆iǩani, ar şuroni, ar boçi Eǩevit̆i do eǩat̆eri vikter. Maǩomadu monta şǩimi Barişi Ťop̌i Meme şǩala p̌are yarişi Celilay pontuli var on ǩaişi Nayloni toç̌ina mort̆eri vikter Ora ulun ndğalepe ti içoden Ma ham laǩirdepe moy va maçoden Dulya mipşun xe ti va momaçoden Saǩali buyuği met̆eri vikter Ǩazyaği nioru huy kopxer mǯupi ç̌aǩmaği komiğun va miğun tupi Zabuni vor dolomayoru upi Cindo tudeşa dolot̆eri vikter Va magzalen ǩuçxe miğun mantari Çairi ep̌ç̌opar var on ǩantari Ç̌irina şǩimi ti diu soytari Montaşa ti guri cet̆eri vikter Bost̆ani mçairi var imxoy xoci Mevoǩvata pşǩomar va miğun borci Xolo doliçodu ǩalemi uci Gzalepeti eǩazit̆eri vikter Oxorişa kogamaft̆i çerezde Dida ti momiyonanert̆u sozde Huy zat̆i va mulun kuyonun gyozde Keyemit̆ey xolo et̆eri vikter Derdi mipşun nam giǯva e da şǩimi Mepşonemt̆i va mvalu dida şǩimi Ne cumalepe ne do da şǩimi Alayişa guri cet̆eri vikter ç̌umani mapxa on ptoraten dişǩa Domiceri ç̌eri vana cegişǩvar Dobğurana pucepe si megişǩvar İrituli haşa dot̆eri vikter Cihani şǩimi momiğay ǩarp̌uzi Ma ti himu şeni viyer ǩuduzi Zade paali on var on ucuzi İri ǩale vit̆ur zit̆eri vikter Ar huy oşǩomiǩo felişi ore Çoi şǩimi iritulişi koren İri soişi p̌t̆ǩvar birdem memoren Destan‘on do haşo zit̆eri vikter Domicibit urzenişi p̌et̆mezi Cindo keyutvit ar temizi bezi Huy bet̆e duyapun ntxiri do nezi Momincğonit vit̆ur zit̆eri vikter Hekolendo moğit mçveri ç̌uvali. Hakolendo ciğit yaği do vali. Si mi uci mekcay, lali do lali! Destan’on do haşo, zit̆eri vikter. İriǩale to dogutay verane Ar miti var maktu muç̌o pervane Pxesap̌asi viyer deli divane Ma muç̌o karmat̆e mot̆eri vikter Cenepe mandreşa var amomaçu Gamapçart̆u ama va gamomaçu Toli vap̌a izin mç̌ima kodvarçu Mç̌ima xoşǩaǩali mot̆eri vikter Ç̌umani coçi oren elaft̆ten Ma na p̌i gzalepe ar golaft̆aten Cileni Ngola şǩu so amaft̆aten Mç̌ima eǯemat̆en et̆eri vikter Oxorina cindo kevibği let̆a Sazide ǩvari p̌ç̌um va miğun gest̆a Dest̆ani onç̌aru ust̆a vor ust̆a Ma boyine vit̆ur zit̆eri vikter Et̆rafi duvar‘on var uğun ǩoda Ar oturma ar mbağuna ar oda Piriǩet̆işi p̌ar huy hişo’n moda Ma boyine vit̆ur zit̆eri vikter Ndğaleri memaşǩuy, komonǩoy seri. Romatizma hişo iyen enkseri. Meyevolam, viç̌ver muç̌o amseri. Oyi, oyi! vit̆ur, zit̆eri vikter. Tolepe şǩimişa va mulun nciri. Kocemidveyǩo mep̌ç̌irdum zinciri. Ç̌eri, pai şǩimi si gaminciri. Ma emcami haşo unciru vikter. Mişǩun ǩuçxe daçxuri xumali cemat̆u Romatizma moxt̆u ma moy memat̆u P̌iya mişi intizari momat̆u Feleği emit̆u, et̆eri vikter. Ma moǯeran Moğonaşi gzalepe Demirǩap̌i dovorçart̆u kvalepe Çetini golvaleran didalepe Millet̆işa guri cet̆eri vikter Avlaşa gamaft̆ar va gamomalen Xavesi vor Satapleşa va malen Xaci va vor vana yoxo gomalen Alla razi olsun zit̆eri vikter Ç̌erina babamuşi moyonasen Ǩap̌ula momiba gomiyonasen Bet̆e baba vore gomiyonasen Doğru muşi vit̆ur zit̆eri vikter İt̆uran çi doǩt̆orişa var ulun Maşǩurinen na idasen va mulun Emeǩli vor şǩuni hişo golulun Doğru muşi vit̆ur zit̆eri vikter Saği menduluran komulvan meft̆a Zat̆i ham ǩuçxete muç̌ote goft̆a Golape mevaşǩvar aşǩva va moft̆ar Ma boyine vit̆ur zit̆eri vikter Ham dest̆ani beci kemanç̌inasen. Ma ham derdi mi elemanç̌inasen? Ham zat̆i mele va memanç̌inasen. Oyi, oyi! vit̆ur, zit̆eri vikter. E Yarebbi, nepe manç̌aren guri! Mʒika daa mominžini umuri. Vana moxt̆i, kemiç̌opi ham şuri. Allah, Allah vit̆ur, zit̆eri vikter. Soğuni miyonasen ham illet̆i Erzaili meǩvatasi bilet̆i Oǩovudum cet̆i do cibilet̆i Va mevulur vit̆ur zit̆eri vikter Erzaili vap̌a iç̌itxay yaşi Ǩoşǩiyonay oxorişi em başi Şǩimda komvalayna movalar ǩarşi Va mevulur vit̆ur zit̆eri vikter Oçi var on romatizmaşi çare E Alla laci şǩimi si momçare Ťoxt̆ori mʒudişi para moy çare Oyi oyi vit̆ur zit̆eri vikter Derdi şǩimi si kogişǩun e Alla Kaşǩari tudendo memaşǩvey xvala Oyi p̌t̆ǩvasi toli şǩimi xarxalay Ma boyine vit̆ur zit̆eri vikter Biga cepcam, ǩucxe miğun davuli. Ma bğurare, istersen p̌at ǩavuli. Vigzalare kocep̌ǩarxi bavuli. Vulur vulur vit̆ur, zit̆eri vikter. Erzaili mext̆u do kodogutu Giyonar deyi kogoyomogutu Dovuyoxisi çi dunya gongutu Va mevulur vit̆ur zit̆eri vikter Ǩarşi na movali mvalu t̆evafi. Ziʒu do miǯu ci ‘Si or muafi!’ Suci komiğunna mo ikum afi. Dovuǯvi do haşo zit̆eri vikter. Moyselu igzalu var eǩiǯedu Na p̌t̆ǩvi laǩirdepe mondo moǯondu Ma vilaxi çere moyomoǯordu Doğru muşi vit̆ur zit̆eri vikter Sǩanişǩala ar dop̌at pazarluği. Ali kocemidvi ar nazarluği. Ma gamomiǩati ar mezarluği. Soni meft̆ar vuǯvi, zit̆eri vikter. Sǩani şǩala moro margen-i leri? Ezrail’or ar cantxer muç̌o mcveri Mati meft̆ar ama aşǩva em ceri Dovuǯvi do haşo zit̆eri vikter “Va moft̆ar” deite komomci sozi. Vanati huy, hay dovipaat ǩozi. Zat̆i şuri dolomiren ar ǩuzi. Devamı yorumda......