RC MRINDOKO AKAGUA MAENDELEO YA UJENZI WA BARABARA YA LAMI KAGWIRA–KAREMA

RC MRINDOKO AKAGUA MAENDELEO YA UJENZI WA BARABARA YA LAMI KAGWIRA–KAREMA Mkuu wa Mkoa wa Katavi, Mhe. Mwanamvua Mrindoko, amekagua maendeleo ya ujenzi wa barabara ya Kagwira–Karema inayotekelezwa katika Wilaya ya Tanganyika, ikiwa ni sehemu ya muendelezo wa kukagua miradi ya maendeleo mbalimbali inayotekelezwa Mkoani Katavi. Katika ziara hiyo ya ukaguzi, RC Mrindoko amepata fursa ya kujionea hatua mbalimbali za utekelezaji wa mradi huo muhimu wa miundombinu. Barabara hiyo inatarajiwa kurahisisha usafiri na usafirishaji wa watu na mizigo, hasa kwa wananchi wanaoishi katika maeneo yanayozunguka Ziwa Tanganyika. Akizungumza wakati wa ukaguzi huo, RC Mrindoko amesisitiza umuhimu wa wakandarasi kuhakikisha kazi ya ujenzi inafanyika kwa kuzingatia viwango vinavyotakiwa ili mradi huo uweze kuwanufaisha wananchi wa Tanganyika na mkoa wa Katavi kwa ujumla na kuchochea maendeleo ya kiuchumi katika ukanda huo. Mbali na ukaguzi wa barabara hiyo, Mkuu wa Mkoa ametembelea pia Bandari ya Karema, ambapo amekagua miundombinu yake na kueleza kuwa bandari hiyo ina nafasi muhimu katika kukuza biashara pamoja na kuimarisha usafiri wa majini ndani na nje ya Mkoa wa Katavi. Amebainisha kuwa bandari hiyo ni kiungo muhimu cha usafirishaji kinachounganisha maeneo mbalimbali yanayozunguka Ziwa Tanganyika. Aidha, akizungumza na wananchi pamoja na viongozi wa eneo hilo, Mhe. Mrindoko amewahimiza wananchi wa Wilaya ya Tanganyika tarehe 13/3/2026 kujitokeza kwa wingi kumpokea Waziri Mkuu wa Jamhuri ya Muungano wa Tanzania Mhe. Dkt. Mwigulu Lameck Nchemba wakati wa ziara yake mkoani Katavi ambapo ataanzia Wilaya ya Tanganyika. Amesisitiza kuwa ziara hiyo ni fursa muhimu kwa wananchi kushuhudia juhudi za Serikali katika kuwaletea maendeleo kupitia utekelezaji wa miradi ya kimkakati ya miundombinu na huduma za kijamii.