Suv transportida xavfsizlikni ta'minlash yo'lida navbatdagi nazorat tadbiri

Transport nazorati inspeksiyasining Suv transportida nazorat qilish Toshkent viloyati bo‘limi hamda Toshkent viloyati Favqulodda vaziyatlar boshqarmasi xodimlari hamkorligida Toshkent dengizida navbatdagi nazorat va profilaktik tadbirlar o‘tkazildi. Tadbir davomida suv transporti vositalaridan foydalanish qoidalariga rioya etilishi, fuqarolarning suvda harakatlanish xavfsizligi hamda qutqaruv vositalarining mavjudligi va ulardan to‘g‘ri foydalanish holatlari o‘rganildi. Shuningdek, dam oluvchilar va suv transporti egalari bilan profilaktik suhbatlar o‘tkazilib, suv havzalarida xavfsizlik qoidalariga qat’iy amal qilish, qutqaruv jiletlaridan foydalanish hamda belgilangan tartiblarga rioya etish yuzasidan tushuntirish ishlari olib borildi. Bunday hamkorlikdagi nazorat tadbirlari suv transportida xavfsizlikni ta’minlash, baxtsiz hodisalarning oldini olish hamda fuqarolarning hayoti va sog‘lig‘ini muhofaza qilishga xizmat qiladi.