MWANRI AWAVUNJA MBAVU WAJUMBE AKISAKA UBUNGE SIHA

Wakati wa lala salama la kampeni za kuomba kura kwa wajumbe wa CCM, wagombea wa ubunge wa Jimbo la Siha mkoani Kilimanjaro leo Jumapili, Agosti 3, 2025 wamejitambulisha katika Kijiji Ngumaru, Kata ya Songona, kueleza mikakati yao endapo watachaguliwa, huku Mkuu wa Mkoa mstaafu, Agrey Mwanri akivunja mbavu wajumbe kwa namna yake ya kujieleza. Mwanri amesisitiza juu ya ajira kwa vijana na uwezeshaji wa wanawake kiuchumi. Hata hivyo, ucheshi wake na mifano aliyotumia katika maelezo yake uliibua vicheko vya muda mrefu miongoni mwa wajumbe. Upande wa Dk Godwin Mollel, ambaye ni Naibu Waziri wa Afya, ameahidi kuendeleza juhudi za kuboresha huduma za afya katika jimbo hilo, akisisitiza upatikanaji wa vifaatiba na kuimarisha miundombinu ya hospitali na zahanati. Upande wake, Meijo Laizer amesisitiza umuhimu wa teknolojia katika kuleta maendeleo ya kijamii na kiuchumi. Wengine wanaosaka ridhaa ya kuongoza jimbo hilo ni Tumsifu Kweka, Bertha Mlay, Petro Kitingala, Dk Aggrey Mosha. Video na Ombeni Daniel