TATHIMINI YA USHIRIKA SABASABA 2026

Tume ya Maendeleo ya Ushirika Tanzania (TCDC) imesema ushiriki wa vyama vya ushirika katika Maonesho ya 49 ya Biashara ya Kimataifa ya Dar es Salaam (Sabasaba) umeendelea kufungua fursa mpya za biashara, kuongeza wigo wa masoko na kuwapatia wanachama nafasi ya kujitangaza na kujifunza mbinu bora za kuongeza thamani ya bidhaa na huduma zao. Akizungumza katika maonesho hayo, Mhasibu Mkuu wa TCDC, Valency Kalunde amesema maonesho ya mwaka 2026 yamekuwa na mafanikio makubwa kutokana na uwekezaji na usimamizi wa Serikali kupitia TanTrade, hali ambayo imeendelea kuvutia washiriki wengi zaidi kila mwaka. Kalunde amesema TCDC imeshiriki maonesho hayo pamoja na vyama vya ushirika vinavyovisimamia, ambapo katika kipindi cha miaka michache iliyopita kumekuwa na mwamko mkubwa wa vyama kushiriki, kujitangaza na kubadilishana uzoefu wa kibiashara. Ameeleza kuwa vyama vingi vilivyoshiriki vimeripoti kupata wateja wapya na fursa za kufanya biashara, hatua inayotarajiwa kuongeza ukuaji wa sekta ya ushirika na kuimarisha uchumi wa wanachama wake. Aidha, amesema wananchi wengi waliotembelea banda la TCDC walitaka kufahamu zaidi kuhusu bidhaa za kilimo zilizoongezwa thamani, namna ya kuzipata pamoja na huduma za kifedha zinazotolewa kupitia vyama vya ushirika, ikiwemo mikopo na taratibu zake. Kalunde amewahimiza Watanzania kuendelea kujiunga na vyama vya ushirika, akieleza kuwa ushirika unaendelea kupewa kipaumbele na Serikali kutokana na mchango wake katika kukuza uchumi jumuishi, kuongeza kipato cha wananchi na kuchochea maendeleo ya Taifa.