“Nilipozaliwa wazazi wangu hawakujua kama ni mwanamke au mwanaume: Familia yangu ilinisaidia sana”

Katika maadhimisho ya Siku ya Familia Duniani leo Mei 15, hadithi ya Baby John Musamba inatoa taswira halisi ya changamoto na nguvu ya familia katika kuyakabili maisha yasiyo ya kawaida. Alizaliwa na hali ya jinsia tata, hali ambayo kitaalamu huitwa intersex, ambapo mtu huzaliwa na maumbile ya uzazi au ya kijinsia yasiyoendana moja kwa moja na tafsiri za kawaida za kuwa msichana au mvulana. “Nilipozaliwa, hakukuwa na uhakika… Daktari alisema ‘huyu si mvulana, si msichana pia.’ Wazazi wangu walitazamana… kisha wakasema, ‘Tuna mtoto,’” anasimulia Baby. Katika jamii nyingi za Kitanzania, suala la jinsia tata ni miongoni mwa mada ambazo hazizungumzwi kwa uwazi kutokana na hofu, aibu, na ukosefu wa uelewa. Hali hii huwafanya watoto wenye hali hiyo kukumbwa na unyanyapaa, kutengwa au hata kufichwa na familia zao. Hata hivyo, familia ya Baby John ilichukua msimamo tofauti, waliamua kumkumbatia mtoto wao kwa upendo na kumlea bila woga, jambo ambalo linatufundisha kuwa familia inaweza kuwa nguzo muhimu ya ulinzi na maendeleo ya kijamii. Kwa mujibu wa tafiti zilizowahi kufanyika duniani na Intersex Campaign for Equality, watu wenye jinsia tata hufikia asilimia 1.7 ya watu wote duniani, ingawa nchini Tanzania utafiti kuhusu hali hii bado haujajikita kikamilifu. Ukosefu wa takwimu sahihi huathiri mipango ya sera na huduma kwa watu wa kundi hili. Kauli mbiu ya mwaka huu katika Siku ya Familia ni “Kuboresha Sera za Familia kwa Maendeleo Endelevu,” jambo linalosisitiza umuhimu wa kujenga sera jumuishi zinazotambua uhalisia wa watu wote, ikiwemo wale walio na jinsia tata. Katika muktadha wa maendeleo ya familia, Baby John Musamba ni mfano wa jasiri wa kizazi kipya kinachovuka mipaka ya mila na mitazamo potofu. Amelelewa kwa misingi ya upendo, heshima na maelewano, hali iliyomwezesha kuishi maisha ya kawaida licha ya changamoto alizokumbana nazo. Hii ni changamoto kwa jamii pana kutafakari upya mitazamo yao kuhusu jinsia na utu wa binadamu. Kwa siku kama ya leo, tunawakumbusha wazazi, walezi na jamii kwa ujumla kuwa mafanikio ya mtoto hayapo kwenye sura ya jinsia, bali katika upendo, malezi bora na kuaminiwa. Familia ya Baby John imeonesha kuwa hakuna hali yoyote inayopaswa kumzuia mtoto kuishi maisha ya heshima. Kwa maneno mengine, familia ni msingi wa mafanikio au kushindwa kwa maisha ya mtoto. Hadithi ya Baby John Musamba si tu inasisimua, bali ni wito wa mabadiliko ya kifikra, sera na jamii kwa ujumla. Hii ni simulizi ya matumaini, ujasiri na mshikamano. Fuatilia zaidi hadithi hii hapa, kwa sababu kila sauti ya mtoto inastahili kusikika, kuenziwa na kulindwa, iwe ni ya mvulana, msichana au hata mtoto mwenye jinsia tata.