KWA UCHUNGU MUME, WATOTO WAKIMUAGA MCHUNGAJI WA KKKT , WENGINE WASHINDWA KUJIZUIYA WAANGUA VILIO

Vilio na simanzi vimetawala katika Usharika wa Kisamo, Dayosisi ya Kaskazini ya Kanisa la Kiinjili la Kilutheri Tanzania (KKKT), wakati wa kuaga mwili wa Mchungaji Kantate Munisi ambaye atazikwa leo usharikani hapo. Mapema leo Ijumaa Agosti 9, 2024 wakati mwili wa mchungaji huyo ukiagwa kanisani hapo, mamia ya waombolezaji waliofika kushiriki ibada ya maziko, walishindwa kujizuia kulia huku wengine wakianguka kutokana na kuishiwa nguvu. Ibada hiyo ambayo imehudhuriwa na wachungaji kutoka maeneo mbalimbali ikiwemo Dayosisi ya kaskazini alikokuwa akihudumu na Dodoma alikoanzia huduma, pia imehudhuriwa na viongozi mbalimbali wa taasisi dini na Serikali. Munisi aliyekuwa mchungaji kiongozi wa usharika wa Kimashuku, pamoja na mzee wa usharika wa kanisa hilo, Laban Kweka walifariki dunia kwa ajali Agosti 4, mwaka huu baada ya gari walilokuwa wakisafiria kutoka katika uimbaji wa kanda usharika wa Gezaulole wilayani Hai, kugongwa na basi. Kwa mujibu wa taarifa iliyotolewa na Kamanda wa Polisi Mkoa wa Kilimanjaro Agosti 5, 2024, Simon Maigwa ajali hiyo ilitokea Jumapili Agosti 4, mwaka huu katika eneo la Kimashuku, kata ya mnadani wilaya ya Hai, mkoani humo, wakati mchungaji huyo akikatiza barabara upande wa kulia kuingia kanisani kwake. Aidha, Kamanda Maigwa amesema dereva wa basi hilo amekamatwa na taratibu za kisheria zitachukuliwa, kwa kuwa alifanya uzembe kuyapita magari mengine bila kuchukua tahadhari.