ཁ་འབབ་ཆུ་བོ་བཞིའི་མགོ་ཁུངས། Indus River Source

རྡོ་རྗེ་གདན་གྱི་བྱང་གི་ཕྱོགས།། རི་ནག་དགུ་བརྩེགས་ཕ་རོལ་ན།། སྤོས་ངད་ལྡང་གི་ཚུར་རོལ་ན།། མ་ཕམ་གཡུ་མཚོ་སྔོན་མོ་ཆགས།། འགའ་རེས་མ་དྲོས་མཚོ་ཆེན་ཟེར།། ཀླུ་རྒྱལ་མ་དྲོས་གཟི་ཅན་བཞུགས།། རི་རྒྱལ་གངས་དཀར་ཏི་སེ་དང་།། མཚོ་རྒྱལ་མ་ཕམ་གཡུ་མཚོ་གཉིས།། འཛམ་བུ་གླིང་གི་ལྟེ་བ་ཡིན།། སྲིད་པ་ཆགས་པའི་འགོ་མ་ཡིན།། སྐྱེ་འགྲོའི་འབྱུང་སའི་ཡབ་ཡུམ་ཡིན།། ཕྱོགས་བཞི་ལོགས་ནས་ཆུ་བཞི་འབབ།། ནུབ་གླང་ཆེན་ཁ་ནས་སི་ཏ་འབབ།། རྫ་རི་པདྨ་སྤུངས་འདྲའི་མདུན།། གླང་ཆེན་འགྱིང་འདྲའི་རི་བོའི་ལྷོར།། ཆུ་མིག་འཐུང་བ་རང་གྲོལ་ནས།། རི་ནག་དགུ་བརྒྱུད་ནུབ་ལ་འབབ།། ནུབ་ནས་གུག་སྟེ་ལྷོ་ལ་འབབ།། བྱང་སེངྒེའི་ཁ་ནས་སིན་དྷུ་འབབ།། བྲག་རི་མཁའ་འགྲོ་ཚོགས་འདྲའི་མདུན།། སེངྒེ་འགྱིངས་འདྲའི་རི་བོ་ནས།། མཚོ་བཞི་བཤགས་ཤིང་བྱང་ལ་འབབ།། བྱང་ཤམ་བྷ་ལ་ནས་ལྷོ་ལ་འབབ།། ཤར་རྟ་མཆོག་ཁ་ནས་པཀྵུ་འབབ།། བྲག་དམར་རིན་ཆེན་སྤུངས་འདྲའི་མདུན།། རྟ་མཆོག་འཛིན་གྱི་རི་བོའི་ཤར།། གསེར་གྱི་བྱེ་མ་གཡུང་དྲུང་ནས།། བོད་རུ་བཞི་བཤགས་ནས་ཤར་ལ་འབབ།། ཤར་ནས་གུག་སྟེ་ལྷོ་ལ་འབབ།། ལྷོ་རྨ་བྱའི་ཁ་ནས་གྷ་གྷར་འབབ།། བྲག་རི་གཡུང་དྲུང་སྤུངས་འདྲའི་མདུན།། རྨ་བྱ་བསྣོལ་བའི་རི་བོ་ནས།། གངས་དགུ་བཤགས་ཤིང་ལྷོ་ལ་འབབ།། ལྷོ་ནས་གུག་སྟེ་ཤར་ལ་འབབ།། དེ་སྟོད་ཀྱི་ཁ་འབབ་ཆུ་བཞི་རེད།།