५. उन्हासारखा हर्ष माझा असावा - बा.भ.बोरकर (सुमंदारमाला)

जरा संधी मिळाली की मित्रमंडळीला कविता ऐकवत बसण्याची माझी खोड जुनी आहे. मग कविता ऐकतानाचे त्यांचे चेहरे, हावभाव, कळल्या आहेत अशा वाटणाऱ्या ओळींबद्दलच्या गप्पा आणि न कळलेल्या ओळींबद्दलच्या त्याहूनही जास्त गप्पा ह्यात दिवसच्या दिवस संपतो. माझी मैत्रीण केतकी कथ्थक नृत्यांगना आहे. अशीच तिला एकदा ‘बांधणीच्या कवितां’ची कल्पना सांगत होते आणि मग बा.भ.बोरकरांची सुमंदारमालेतली कविता ऐकवता ऐकवता तिचे हावभाव बदलताना पाहात होते. कविता संपली तरी केतकी त्याच झोनमध्ये होती. माझ्या आवडीची कविता तिला कशी दिसत्ये हे मलाही बघावसं वाटत होतं, म्हणून मग वाटलं की बोरकरांची ही सुमंदारमाला channelसाठी केतकीलाच सादर करायला सांगितली तर? एकदा कल्पना सांगितल्यावर आणि केतकी तयार झाल्यावर इंग्लंडमधून पुण्यात सगळी जमवाजमव करून आणणं, योग्य त्या माणसांशी संपर्क साधणं, पुण्यात बंदिवास लागू होण्याआधी कवितेचं शूटिंग करणं ह्या सगळ्या गोष्टींसाठी मला Ketaki Kunte Mate, Ketaki Kulkarni आणि Nitin Umare ह्यांनी सगळ्यांनी प्रेमाने मदत केली; शिवाय अप्रत्यक्षपणे मदत करणारेही अनेक हात सुदैवाने आमच्या आजुबाजूला होते. त्या काही दिवसांत कवितेच्या अर्थाबद्दल, वजनाबद्दल, वेगाबद्दल बोलताना, कवितेत डुंबताना बाकी सगळं विसरायला झालं होतं! तर आमचा आनंद तुमच्यापर्यंत पोहोचवण्याच्या हा एक प्रयत्न -- बांधणीच्या कवितांवर बोरकरांची सुमंदारमालेतली कविता, केतकीच्या नजरेतून. कविता - बा.भ.बोरकर नृत्य आणि दिग्दर्शन – केतकी कुंटे माटे संकल्पना – अर्निका परांजपे छायाचित्रण – नितीन उमरे सहाय्यक – निखिला उमरे उन्हासारखा हर्ष माझा असावा घरातून बाहेर यावी मुले नभासारखा शोक माझा असावा तृणातूनदेखील यावी फुले जळासारखी तृप्ति माझी असावी स्त्रियांनी कडेचे भरावे घडे उषेसारखी दीप्ति माझी असावी फुलावे भविष्यातले केवडे भुईसारखी प्रीत माझी असावी खणी त्याजलाही फुटावे झरे निशेसारखी शांति माझी असावी कुशीला विसाव्यास यावी घरे तरीही नसावे असोनी जगी या निरालंब छांदिष्ट वाऱ्यापरी कळावे न कोणा कसा पार झालो भुलावून लोकांस पाऱ्यापरी बा.भ.बोरकर