ممارسة العلاقة الجنسية ليلة الزفاف (رأي الشارع)

هل يجب على العريس والعروسة ممارسة الجنس مباشرة بعد الفرح؟ هل من المقبول أن ينتظروا بضعة أيام؟ شاهدوا الفيديو وتعرفوا على رأي الشارع ورأي العِلم. فرح ... توتر ... شَدّة ... كل واحد بيجري عشان يبقى في أحسن صورة. العروسة لازم تبقى على سنجة عشرة. العريس لازم يبقى جايب أخر ما عنده. باختصار، الجهاز السيمباثاوي المسؤول عن أنك تطلع تجري شغال على أعلى سرعة. عمرك شفت واحد طالع يجري واقف يمارس جنس عالسريع كدة؟ مابتحصلش. علشان نقدر نسترخي ونمارس علاقة جنسية لازم جهاز تاني يشتغل في المخ - الجهاز الباراسيمباثاوي. تعالوا نسمع آراء الشارع عن ممارسة الجنس مباشرة بعد الفرح. تقول د. رضوى سعيد تعقيباً على آراء الناس في الشارع المصري: "مش بس العروسة والعريس بيبقوا مشدودين، غالباً بيكونوا ماعندهمش قدرات نفسية وجسدية لممارسة الجنس وينبسطوا فيه. كمان المجتمع بيبقى قاعد وكأنه مستني اللحظة اللي في الفيلم اللي هتكسر السينما. عايز يتطمن أن محمدين هيقوم بالمهمة وهيشرفهم وهيرفع راسهم، وأن فتحية هي اللي حفظت وصانت شرف الأسرة - وكأن شرف الأسرة متعلق كله بفيلم يغيب عنه كل المشاعر والأحاسيس. " لا علاقة لكل هذا بممارسة الجنس الصحيحة من الناحية البيولوجية والنفسية والحسية. وتضيف: "نتيجة هذا الضغط من بعض الناس اللي بيتمسكوا بهذه العادات والتقاليد، ممكن علاقتهم الجنسية تبوظ بقية حياتهم. الزوجة تصاب، وتعاني من، تشنج مهبلي، ويظل الزوج يحاول ممارسة الجنس معها وكأنه يدخل في حائط سد.  مش بس كدة، بسبب التشنج المهبلي لدى الزوجة، مع الوقت، يبدأ الزوج يعاني من ضعف جنسي لأنه حاسس أن الزوجة ترفضه. هو مش فاهم أنها مش قادرة تتخطى الخناقة الكبيرة اللي ابتدت من قبل يوم الفرح. سبق يوم الفرح تربية طويلة من المجتمع والأم والأب أن البنت يوم الفرح لازم تثبت شرفهم وتثبت أنها كانت بنت تقية وصالحة - حيث لا يوجد إثبات آخر لحسن تربيتها. #الممارسة_الحميمة