Zeynəb Cavadlı üçün niyə səsimizi çıxarmırıq?

Ərəb şeyxinin qardaşı ilə evli olan azərbaycanlı, tanınmış gimnastımız Zeynəb Cavadlı ilə bağlı yayılan xəbərlər ciddi narahatlıq doğurur. Bildirilir ki, o, Dubay polisi tərəfindən üç qızı ilə birlikdə saxlanılıb. Hazırda onun vəziyyəti barədə dəqiq məlumat yoxdur. Onun anasının da Dubaydan çıxışına qadağa qoyulduğu iddia edilir. Bu səbəbdən Zeynəbin, övladlarının və anasının təhlükəsizliyi ilə bağlı suallar artır. Cəmiyyət olaraq bu məsələyə biganə qalmamalıyıq. Bunu xüsusilə vurğulayıram. Çünki günlərlə Rəksanələr, Baboşlar, Bayram Nurlular, Vəlizarlar və digər hec bir işə yaramayanlar haqqında danışan, paylaşım edən insanlar bu gün Azərbaycanı beynəlxalq arenalarda təmsil etmiş bir idmançının taleyi ilə bağlı eyni həssaslığı göstərmirlər. Halbuki Zeynəb Cavadlı illərlə Azərbaycan bayrağını dünya arenalarında dalğalandırıb, Azərbaycan Respublikasının Dövlət Himninin səslənməsinə töhfə verib. O, ölkəsini təmsil edib, uğurları ilə xalqımıza sevinc yaşadıb. Bu gün isə onun və övladlarının taleyi ilə bağlı ciddi suallar var. Belə bir məqamda susmaq və biganə qalmaq qəbulolunmazdır. Söhbət təkcə məşhur bir idmançıdan deyil, Azərbaycanı təmsil etmiş bir vətəndaşdan, bir anadan və üç azyaşlı uşağın gələcəyindən gedir. Zeynəb Cavadlının, övladlarının və anasının vəziyyəti ilə bağlı aydın və rəsmi məlumat verilməsini tələb etmək hər birimizin haqqıdır.