MAAFISA UGANI WAPATIWA MAFUNZO KUIMARISHA UZALISHAJI WA KOROSHO

Maafisa Ugani wa Kilimo kutoka Halmashauri za Wilaya za Kilwa na Ruangwa wamehimizwa kutumia maarifa na ujuzi wanaoupata kupitia mafunzo ya Climate Smart Agriculture/Horticulture na e-Agriculture Solutions katika kuongeza tija, uzalishaji na ubora wa zao la korosho. Wito huo umetolewa na Kaimu Mkurugenzi Mkuu wa Bodi ya Korosho Tanzania, Ndugu Sumwike Kajela, wakati wa ufunguzi wa ziara ya mafunzo kwa washiriki hao katika Ofisi za Bodi ya Korosho Tanzania, Mtwara. Ziara hiyo ililenga kuwajengea washiriki uelewa kuhusu majukumu ya Bodi ya Korosho Tanzania na mchango wake katika maendeleo ya tasnia ya korosho nchini. Mafunzo hayo yanaendeshwa na Chuo cha Mafunzo ya Kilimo (MATI) Naliendele, mkoani Mtwara, chini ya programu ya Wizara ya Kilimo, yakilenga kuwajengea uwezo maafisa ugani katika matumizi ya teknolojia za kisasa za kilimo, mbinu za kukabiliana na athari za mabadiliko ya tabianchi pamoja na matumizi ya mifumo ya kidijitali katika utoaji wa huduma za ugani kwa wakulima. Mafunzo hayo yalianza tarehe 12 Mei 2026 na yameendeshwa kwa awamu nne, huku awamu ya mwisho ikianza tarehe 8 Juni 2026 na kukamilika tarehe 12 Juni 2026.