Рашитжон Қодиров ҳақида Мирзиëев 1,5 йил олдин ваъда қилган фильм намойиши нега кечикаяпти?

Президент Шавкат Мирзиëев Ўзбекистон собиқ бош прокурори Рашитжон Қодировни суд ҳукм чиқармай туриб¸ “қип-қизил ўғри” деб атаган ва 2018 йилнинг 19 майида “икки-уч ой ичида телевидение орқали ўзини гапиртираман” деб ваъда берган эди. "МТРКнинг ижодий ва техник гуруҳи аъзолари томонидан тайёрланган кўрсатув" тайёрлиги ва у барча каналларда намойиш қилинажаги тўғрисида шу йилнинг августида маҳаллий нашр хабар қилган эди. Озодликка маълум бўлишича¸ мамлакат раҳбарининг топшириғидан сўнг Бош прокуратура ҳузуридаги Ахборот-таҳлил мультимедиа маркази МТРК билан ҳамкорликда “Рашитжон Қодиров бошчилигидаги жиноий тўда” ҳақида махсус фильм суратга олишга киришган. Бироқ Президент ваъдасидан 1,5 йил, фильм тайёр бўлгани тўғрисидаги хабар чиққанидан бери 3 ойдан ортиқ вақт ўтса ҳамки, фильм намойиш қилинмади. Прокурорнинг қўлга олиниши Ўзбекистон Бош прокуратурасини 15 йил бошқарган Рашитжон Қодиров 2018 йил, 22 февралда ҳибсга олиниб¸ 2019 йил, 26 июнда 10 йилга озодликдан маҳрум қилинди. Қодиров¸ пора олиш, пора беришга воситачилик қилиш, фирибгарлик¸ солиқлар ёки бошқа мажбурий тўловларни тўлашдан бўйин товлаш¸ жиноий фаолиятдан олинган даромадларни легаллаштириш каби жиноятларни содир этганликда айбдор деб топилди. Қодиров билан айни маҳкамада прокуратура ва МХХнинг жами 12 собиқ юқори лавозимли амалдори устидан ҳукм ўқилди.