လှေကလေး ဘိလပ်ပြန်သန်း မြန်မာ ဂန္တဝင် မူရင်း အင်္ဂလိပ် သီချင်း Bilat Pyan Than Myanmar Burmese Song

အာဇာနည်နေ့ ဂုဏ်ပြုဆောင်းပါး (ပထမပိုင်း) 💿🎶ဗိုလ်ချုပ်၏ အနှစ်သက်ဆုံး အနုပညာရှင် (သို့) နိုင်ငံတော် အတိုင်ပင်ခံ၏ အုပ်ထိန်းသူ ဒုတိယမိခင် ဓါတ်ပြား အဆိုတော်ကြီး 🎶📀 မကြာခင်ကျရောက်တော့မည့် အာဇာနည်နေ့အတွက် ဗိုလ်ချုပ် အမှတ်တရအဖြစ် ဗိုလ်ချုပ်အောင်ဆန်း၏ အသဲစွဲ “လှေကလေး” ဓါတ်ပြားသီချင်းအဆိုတော် စစ်ကြိုခေတ်မှ ရှားပါး ဘီအေဘွဲ့ရ အမျိုးသမီး ပညာတတ် ဘိလပ်ပြန် (သန်း) ခေါ် Dora Than E. ၏ တိမ်မြုပ်နေသော ခေတ်ဟောင်းဓါတ်ပြားများကို ဂီတထံတျာ အနုပညာအသံပြခန်းမှ အပိုင်းခွဲ၍ တင်ဆက်ပေးပါမည်။ တိုင်းပြည် လွတ်လပ်ရေးရရန် အတွက် ကိုယ်ကြိုးမဖက် စွမ်းစွမ်းတမံ နေ့ရော ညပါ ကြိုးပမ်းခဲ့သော ဗိုလ်ချုပ်အောင်ဆန်း၏ ဘဝတွင် မိမိတိုင်းပြည်နှင့်လူမျိုး သူ့ကျွန်သဘောက်ဘဝမှ လွတ်မြောက်ရန်ဟူသော ရည်ရွယ်ချက်မှ လွဲ၍အခြား ဘာမျှမရှိခဲ့ပေ။ ရုပ်ရှင်၊ ဂီတအပါအဝင် အပျော်အပါးမဖက် မိမိချစ်သော မိသားစုကိုပင် ဦးစားမပေးနိုင်ပဲ အရိုးကြေကြေ အရေခမ်းခမ်း တိုင်းပြည်အတွက် နေ့မအား ညမအားကြိုးပမ်းရင်းသာ တန်ဖိုးရှိသော သူ၏အချိန်များအား ကုန်လွန်စေခဲ့၏။ သူ၏ အနီးကပ်ဆုံး ကိုယ်ရေး အရာရှိ ဗိုလ်ထွန်းလှ(စာရေးဆရာ တက္ကသိုလ် နေဝင်း)၏ ပြောပြချက်အရ ဗိုလ်ချုပ်အောင်ဆန်းသည် လွန်စွာအလုပ်ပိ၍ စိတ်ဖိစီးသော အချိန်များတွင်မှသာ စိတ်ထွက်ပေါက်တစ်ခုအဖြစ် ပြဇာတ်မင်းသား ဖိုးပါကြီး၏ စစ်တွင်းပြဇာတ်များကို ရှောင်တခင် ဝင်ကြည့်တတ်သည့်နည်းအတူ အလုပ်များခေါင်းရှုပ်ချိန်တွင် သူမှတ်မိသော တစ်ပုဒ်တည်းသော “လှေကလေး”သီချင်းကိုလဲ ညည်းဆိုတတ်သေးသည်ဟူ၏။ ၁၉၄၇ ဇန်နဝါရီလတွင် ဘိလပ်သို့ နိုင်ငံရေး ဆွေးနွေးပွဲ တက်ရောက်လာသော ဗိုလ်ချုပ်သည် သူနှစ်သက်သော အဆိုတော် မသန်းဧအား တကူးတကဖိတ်ကြား၍ အင်္ဂလန်နိုင်ငံတွင်ပြုလုပ်သော သူ၏ထိပ်တန်းနိုင်ငံရေးခေါင်းဆောင်များအား ဖိတ်ကြားသော ဧည့်ခံပွဲတွင် သီဆိုစေခဲ့ပါသည်။ ပွဲအပြီးတွင် ဗိုလ်ချုပ်က သူမအား မြန်မာပြည်သို့ပြန်လည်ကာ အလုပ်လုပ်မည်ဆိုပါက သူမနှင့် သင့်လျော်သော လုပ်ခန့်အပ်ပါမည်ဟု ကတိစကားပြောကြားခဲ့၏။ ထိုသို့ ထင်ပေါ်၍ စင်တော်မှ မြောက်စားရအောင်လည်း ဘိလပ်ပြန် သန်း (ခေါ်) ဒိုရာ မသန်းဧ သည် ပညာရေး အပါအဝင်၊ နိုင်ငံရေး သာမက အင်္ဂလန်ရှိ အနုပညာ အသိုင်းအဝိုင်းတွင်ပင် ကမ္ဘာ့ ရင်ဘောင်တန်းနိုင်ခဲ့သည့် မြန်မာအမျိုးသမီးကြီးတစ်ဦး ဖြစ်ခဲ့သည်။ ငယ်စဉ်ကပင် Methodist (မက်သဒစ်) ယခုဒဂုံ(၁) ကျောင်းထွက်၊ စစ်ကြိုခေတ် ရန်ကုန် တက္ကသိုလ်ကျောင်းသူ၊ အင်္ဂလန် ဆရာအတပ်သင် ကောလိပ်မှ ဘွဲ့ရခဲ့သည်သာမက၊ ဒုတိယ ကမ္ဘာစစ်အတွင်းတွင်လည်း အိန္ဒိယသို့ စွန့်စားသွားရောက်ကာ All India Radio(AIR) သတင်းထောက် အဖြစ်တဖုံ၊ ကမ္ဘာ့ကုလသမ္မဂ (UN) တွင် ၂၄ နှစ်ကြာ တာဝန်ထမ်းဆောင်ခဲ့သော သူမသည် မြန်မာပြည်အတွက် တန်ဖိုးမဖြတ်နိုင်သော ရတနာ တစ်ပါးပါပေ။ သို့သော် မမြင်တွေ့နိုင်သော ကံကြမ္မာအလှည့်အပြောင်းအရ သူမ ဗိုလ်ချုပ်နှင့်တွေ့ဆုံပြီး မကြာမှီတွင် ဗိုလ်ချုပ်နှင့် အာဇာနည်ကြီးများသည် လွပ်လပ်ရေးတိုက်ပွဲဝင်ရင်း မသမာသူများ လက်ချက်ဖြင့် ကျဆုံးခဲ့ရလေသည်။ သို့သော် ဗိုလ်ချုပ်အား ကြည်ညိုလေးစားမှုကို အရင်းခံကာ သူမသည် အာဇာနည်ကြီးကျဆုံးလင့်ကစား သူ၏မိသားစုအား နည်းမျိုးစုံဖြင့် နောက်ကွယ်မှ ထောက်ပံ့ ကူညီပေးခဲ့၏။ သူမ အိန္ဒိယတွင် သတင်းထောက်အဖြစ် တာဝန်ထမ်းဆောင်စဉ် မြန်မာနိုင်ငံသံအမတ်ကြီးအဖြစ် တာဝန်ထမ်းဆောင်နေသော ဗိုလ်ချုပ်ကတော် ဒေါ်ခင်ကြည်နှင့် ရင်းနှီးမှုရရှိကာ သမီးအောင်ဆန်းစုကြည် ပညာရေးအား အကြံဉာဏ်ကောင်းများ ပေးယုံမျှမက သူမ UN ရုံးတွင် တာဝန်ထမ်းဆောင်နေစဉ် အောင်ဆန်းစုကြည်ကလေးအား လာရောက် လုပ်ကိုင်ရန် ဖိတ်ခေါ်၍ သူမအိမ်တွင် ၃ နှစ်ကြာနေစေပြီး ပြုစုစောင့်လျှောက်ပေးခဲ့လေသည်။ ထိုကျေးဇူးတရားများကြောင့် နိုင်ငံတော် အတိုင်ပင်ခံမှ သူမ၏ မိန့်ခွန်းများတွင် မသန်းဧ အား သူမ၏ အချစ်ဆုံး ဂုဏ်သရေရှိဆုံးသောအဒေါ် (သို့) ဒုတိယမေမေဟု ဖွင့်ဟပြောကြားခဲ့၏။ ဒေါ်အောင်ဆန်းစုကြည် နိုင်ရေးဖက်စိတ်ဝင်စားလာသည်မှာ မသန်းဧ၏ လွှမ်းမိုးမှုကြောင့်ဟု ဆိုလျှင်မမှားနိုင်ပေ။ ၁၉၉၅ အတိုင်ပင်ခံ စစ်အာဏာရှင်လက်အောက် ပထမအကြိမ် အကျယ်ချုပ်ကျနေစဉ်တွင် ချီးမြှင့်ခံရသော နေရူးဆုအား မသန်းဧမှ တက်ရောက် လက်ခံရယူပေးရုံမျှမက အတိုင်ပင်ခံ ဖိနှိပ်မှုအောက်တွင် အဖမ်းခံရစဉ် တစ်လျှောက်လုံး သူမ၏ ရင်သွေးလေးများအား မိဘသဖွယ် ရင်အုပ်မကွာ ပြုစုပေးခဲ့သူဖြစ်ပါသည်။ ထို့ကြောင့်လည်း သဘောထား သေးသိမ်သူ မြန်မာ စစ်အာဏာရှင်များ သက်တမ်းတစ်လျှောက် သူမ၏ နာမည်ကျော် စစ်ကြိုခေတ်မှ သက်ဝင်လှုပ်ရှား မြူးကြွခဲ့သော တေးသီချင်းများသည် လွှင့်ခွင့်မရပဲ ငြိမ်သက်ခဲ့ရလေသည်။ မသန်းဧ သည် မြန်မာ့မဟာဂီတ တေးသီချင်းများသာမက အနောက်တိုင်း ဂန္တဝင်တေးသွားများကိုပါ ထုံးလိုခြေ ရေလိုနှောက်နိုင်သဖြင့် မည်သည့်သီချင်းကိုမဆို သာယာနာပျော်ဖွယ် အတိဖြစ်စေရန် ဖန်တီးနိုင်ခဲ့၏။ မငြိမ်သက်သော သူမ၏ ခုံဆွဆွ ပင်ကိုယ်သံလေးကို စာရေးဆရာ ရွှေတိုင်ညွန့်က အနောက်တိုင်းဟန်ဖြင့် လိုက်ဖက်အောင် အနောက်တိုင်းတေးသွားများထဲတွင် ရေးစပ်ပေးခဲ့ရသည်ဟု အဆိုရှိခဲ့ပါသည်။ ယခုဆောင်းပါးတွင် သူမသီဆိုခဲ့သော စစ်ကြိုခေတ် ဓါတ်ပြားများစွာထဲမှ ဗိုလ်ချုပ်အောင်ဆန်း၏ အနှစ်သက်ဆုံးတေးတပုဒ်အား ယနေ့ ဂီတထံတျာ အနုပညာအသံပြခန်းမှ ဖွင့်ပြလိုပါသည်။ ဤသီချင်း၏ မူရင်းတေးသွားသည် ၁၉၃၅ ခုနှစ်တွင် အမေရိကန် နာမည်ကျော် Broadway ပြဇာတ် သီချင်းတစ်ပုဒ်ဖြစ်သည် “Red Sails in the Sunset” ဖြစ်၏။ ဤသီချင်း အဘယ်မျှရေပန်းစားခဲ့သည်ဆိုသော် ထိုခေတ်အခါက ကမ္ဘာကျော် အဆိုတော်တိုင်းနီးနီး ပြန်ဆိုကြရသည်ဟု မှတ်သားရပါသည်။ ထို့ကြောင့်လည်း ၁၉၃၉ မတ်လတွင် ကိုလံဘီယာ ကုမ္ပဏီမှ သီချင်းရေးဆရာ ရွှေတိုင်ညွန့်အား ဘိလပ်ပြန်သန်း သီဆိုနိုင်စေရန် “လှေကလေး” အမည်ဖြင့် ရေးသားဖြန့်ဝေခဲ့ရာ လူတိုင်းနှုတ်ဖျား ရေပန်းစားခဲ့ရလေသည်။ “လှေကလေး” သီချင်းနှင့် ယင်း၏မူရင်း အနောက်တိုင်းတေးသွားကို မသန်းဧ၏ ဘဝပုံရိပ်များ တစိတ်တဒေသနှင့်အတူ ယခုဂီတထံတျာ ပရိသတ်များ ခံစားနားဆင် ဗဟုသုတရစေရန် တင်ပြလိုပေသည်။ (မှတ်ချက်။ ဤဗီဒီယို၏ နောက်ဆုံးအခန်းတွင် ၁၉၉၁ နှစ် ဒေါ်အောင်ဆန်းစုကြည် ရရှိသော နိုဗယ်ဆုပေးပွဲသို့ နိုင်ငံတော် အတိုင်ပင်ခံ မိသားစုဝင်အဖြစ် တက်ရောက်စဉ် ပရိသတ်ကြားမှ သူမ၏ ရှားပါးပုံရိပ်အား ထည့်သွင်းထားပါသည်။)