GƏNCLƏRİN MƏHKƏMƏSİNDƏ POLİS ZORAKILIQ EDİB

Mayın 1-də Bakı Ağır Cinayətlər Məhkəməsində N!DA hərəkatının 7 fəalının və "Azad Gənclik" təşkilatının üzvü İlkin Rüstəmzadənin işi üzrə məhkəmə prosesində fəal Rəşadət Axundov özü daxil olmaqla bütün müttəhimlərin adından hazırlanmış son sözlə çıxış edib. Rəşadət Axundov bütün ittihamları rədd edərək cinayət işinin qurama olduğunu bildirib və bəraət tələb edib. O, "Nida"dakı fəaliyyətlərindən söz açaraq qeyd edib ki, peşmançılığa səbəb olacaq heç bir addım atmayıblar və buna görə də peşman deyillər və məhkəmədən mərhəmət yox ədalət istəyirlər. Hakim hökmün mayın 6-da oxunacağını bildirib. Qeyd edək ki, polis təhlükəsizlik tədbirlərini gücləndirib. Məhkəmə binası əhatəyə alınıb. Məhkəmə binasının qarşısında mülki geyimli polislər tərəfindən jurnalist və vətəndaşlara qarşı fiziki zorakılıq edilib. Xatırladaq ki, 2013-cü ilin mart-aprel aylarında həbs edilən Məmməd Əzizov, Bəxtiyar Quliyev, Şahin Novruzlu, Rəşadət Axundov, Üzeyir Məmmədli, Rəşad Həsənov, Zaur Qurbanlı 2013-cü il martın 10-da Bakıda kütləvi aksiya zamanı "Molotov kokteyli"ndən istifadəyə hazırlıqda ittiham olunur. Gənclərin bir neçəsinə qanunsuz olaraq narkotik vasitələri əldə etmə, saxlama ittihamı da verilib. "Azad Gənclik" Təşkilatının üzvü İlkin Rüstəmzadə isə 2013-cü il mayın 17-də həbs olunub. Əvvəl ona xuliqanlıq ittihamı irəli sürülüb, sonra işə kütləvi iğtişaşları təşkil etmə və ya belə iğtişaşlarda iştiraka cəhd etmə ittihamı da əlavə olunub. Qeyd edək ki, Amnesty International bütün məhbusları "vicdan məhbusu" kimi tanıyıb.