Hacıqabulun Talış kəndinin sakinləri kənd daxili yolların bərbad vəziyyətindən şikayətçidirlər.

2500 nəfərə yaxın sakinin yaşadığı bu kənddə yollar elə vəziyyətdədir ki, məktəblilər divarlara söykənərək yolları keçməli olurlar. Kəndin yolları yayda toz-dumandan, qışda zığ-palçıqdan keçilməz olur. Məlumata görə, son günlər yağan yağışlar səbəbindən gölməçələr yaranıb, yollar yenidən keçilməz olub. Demək olar ki, Talış kəndinin yollarının palçığı qurumur. Sakinlər dəfələrlə yaranmış vəziyyətlə bağlı aidiyyatı qurumlara müraciət etsələr də, baxan olmadığını deyirlər. Deyirlər ki, qış mövsümünün başlamasına hələ var. Ancaq vəziyyət indidən acınacaqlıdır. Öz hesablarına yolları bir neçə dəfə təmir edən sakinlər bələdiyyənin də yaxın durmamasından narazılıq edirlər.