آج ٹاور مسجد کوٹکی میں ایک نہایت روح پرور اور پروقار تقریبِ ختم القرآن کا انعقاد ہوا،

آج ٹاور مسجد کوٹکی میں ایک نہایت روح پرور اور پروقار تقریبِ ختم القرآن کا انعقاد ہوا، جس کی میزبانی استادِ محترم و امامِ مسجد مولانا مراد صاحب نے نہایت احسن انداز میں انجام دی۔ اس بابرکت موقع پر 10 خوش نصیب طلباء کرام نے ناظرہ قرآن کی عظیم سعادت مکمل کی، جس پر علاقے بھر میں خوشی اور مسرت کی فضا قائم رہی۔ تقریب کاآغاز قاری محمد عمران صاحب کے دلفریب تلاوت کلام پاک سے ہوا، جبکہ بچوں نے ختم القرآن کی آخری سورتوں کی سعادت استاد القراء قاری سردار حسین آف نرشک مردان سے حاصل کی۔ تقریب میں علاقے کے جید علماء کرام، معزز مشران، مختلف شعبہ ہائے زندگی سے تعلق رکھنے والے افراد اور نوجوانان نے بڑی تعداد میں شرکت کرکے اس دینی محفل کی رونق کو دوبالا کیا۔علاقائی علماء کرام میں جیدعالم دین مولانا داؤد صاحب اور استاذ العلماء مولانا محمدآیاز صاحب نے موقع کی مناسبت سے خطابات فرمائے جبکہ معروف نعت خوان ، مداح رسول صلی اللہ علیہ وسلم مولانامحمدسہیل نے اپنے سریلی آواز سے شرکاء کے دل جیت لئے۔ اس موقع پر مہمانِ خصوصی خطیب پختونخواہ، مجاہدِ ختمِ نبوت اور جمعیت علماء اسلام صوبہ خیبر پختونخواہ کے نائب امیر مفتی فضل غفور صاحب تھے۔ ضلعی جنرل سیکریٹری جےیوآئی لوئیر دیرمولانا محمد حذیفہ نے اپنے قابل قدر مہمان گرامی و قائد کو اپنے گاؤں آمد پر خوش آمدید کہا اور شفقت فرمانے پر تہہ دل سے شکریہ ادا کیا۔ جبکہ سٹیج سیکریٹری کے فرائض مسجد ہذا کے خطیب مولانا شمشیر خان حقانی اور نوجوان عالم دین مولانا عباد علی نعمانی نے نہایت عمدہ انداز میں سرانجام دیے۔ مفتی فضل غفور صاحب نے اپنے پُراثر، دلنشین اور فکر انگیز خطاب کے ذریعے حاضرین کے دلوں کو گرما دیا۔ انہوں نے قرآنِ مجید کی عظمت، اس کی شان اور اس سے وابستگی کی اہمیت کو نہایت بلیغ انداز میں اجاگر کیا۔ ان کے خطاب نے محفل میں ایک روحانی کیفیت پیدا کر دی، ہر آنکھ اشکبار اور ہر دل قرآن کی تعلیمات کی طرف متوجہ نظر آیا۔ انہوں نے اپنے خطاب میں علماء کرام کے دینی، سیاسی، سماجی اور معاشرتی کردار کو بھی واضح کیا اور اس بات پر زور دیا کہ معاشرے کی اصلاح اور رہنمائی میں علماء کا کردار ناگزیر ہے۔ تقریب کے اختتام پر طلباء کرام کی کامیابی پر دعائیں کی گئیں اور ان کے روشن مستقبل کے لیے نیک تمناؤں کا اظہار کیا گیا۔ یہ بابرکت محفل نہ صرف قرآن سے محبت کو تازہ کرنے کا ذریعہ بنی بلکہ حاضرین کے دلوں میں دینی شعور اور ذمہ داری کا احساس بھی اجاگر کرگئی۔