是按怎泰國人嘛咧講臺語？【是按怎按呢講】EP6

你敢有看過泰國這齣《金孫爆富攻略》？咧看的時陣你敢捌想過：哪會有寡台詞聽起來哪會遮熟似？親像「阿媽食飽未」、「食矣」、「米已成飯」，聽起來和臺語欲倚欲倚。你並無聽毋著，這背後有伊的歷史原因。 真濟出現佇泰國話當中的語詞、話句，其實是來自潮州話。自語言學的角度來看，潮州話屬於閩南語系，和臺語是真接近的。In的共同源頭，來自中國東南沿海一帶，對福建漳州到廣東潮汕，長期因為貿易和移民產生密切連結。 上早佇咧宋、元帝國時期，潮州人就已經開始下南洋，前往東南亞經商。十七世紀清帝國初期，頒布遷界令予大量沿海居民離開家鄉，閣較濟潮州人坐船去到暹羅。十八世紀暹羅戰後當需要人力，自潮州出身的鄭信建立吞武里王朝以後，閣較主動對潮州招募移民。時間來到十九世紀中期，暹羅華人當中大約有四到五成是潮州人，潮州話因此成為當地華人的主要語言，也深深影響今仔日的泰國話。 一部電影內底聽著熟似的語感，其實連結一段跨越千年的移民和交流史。