مەسرور بارزانی، لە "دیداری سەرۆکوەزیران و خەڵک" ٥-٧-٢٠٢٣

مەسرور بارزانی، سەرۆکوەزیرانی هەرێمی کوردستان لە "دیداری سەرۆکوەزیران و خەڵک" چاوی بە ژمارەیەک كه‌سایه‌تی له‌ چین و توێژه‌ جیاوازه‌كانی خه‌ڵكی كوردستان كه‌وت و گفتوگۆیان له‌باره‌ی ئه‌زموونی ئه‌م چه‌ند ساڵه‌ی حوكمڕانی هه‌رێمی كوردستان كرد. پوختەیەک لە گوتە و وەڵامەکانی سەرۆکوەزیرانی هەرێمی کوردستان: • جێی خۆیه‌تی سوپاسێكی بێ پایانی هاووڵاتییانی هه‌رێمی كوردستان بكه‌م، كه‌ به‌ ڕاستی زۆر زۆر پاڵپشت و هاوكار بوون له‌وه‌ كه‌ ئارامییان كێشا له‌گه‌ڵمان وه‌ستان، بڕوایان پێمان بوو، حكومه‌تیان به‌ هی خۆیان زانی. • کەرکووک دڵی کوردستانە، جەنابی بارزانیی نەمر خۆیشی و شۆڕشێکی کردە قوربانیی کەرکووک، بەڵام ئامادە نەبوو دان بەوەدا بنێ کە کەرکووک بەشێک نییە لە کوردستان، ئێستاش ئێمە داکۆکی دەکەین کە کەرکووک بەشێکی دانەبڕاوە لە کوردستان، بەڵام بەداخەوە ئەو ناپاکییەی کە لە 16ی ئۆکتۆبەر کرا ئەم دۆخەی ئێستای لەسەر کەرکووک دروست کرد. • تاکوو ئێمە مابین، بەخوا ئێمە واز لە کەرکووک ناهێنین. • هەرجۆرە تیرۆرێک لە هەر شوێنێکی کوردستان بێت، پێویستە هەموومان بە حکومەت و کۆمەڵگەی مەدەنی و بە ڕێکخراوەکان دژی بوەستینەوە. • من خۆم پێشمەرگە بووم لەگەڵ جەنابی سەرۆک، 52 ڕۆژ هەتا شنگالمان ئازاد نەکرد نەگەڕاینەوە، 500 شەهیدمان دا تا شنگال ئازاد بکەین، ئەوەی شنگالی ئازاد کرد ئێمە بووین و ئەوەی شەهیدیشی لە شنگال دا هەر ئێمە بووین. • من پابەندم بەوەی کە کۆتایی بە گەندەڵی بهێنم، باشترین ڕێگە بۆ بنبڕکردنی گەندەڵی، نەهێشتنی ڕێگەی گەندەڵکارییە، کە ڕێگە نەدەیت چیتر گەندەڵی بکرێت. • ئەوانەی کە ناحەزی منن، ئەو کەسانەن کە لە بەرژەوەندییان دراوە، ئەو کەسانەن کە دەیانەوێت بەردەوام بن لە گەندەڵی و کەس ڕێگرییان لێ نەکات، ئەو کەسانەن کە دەیانەوێت دەست تێکەڵ بکەن لەگەڵ ناحەز و کەس نەبێت ڕێیان لێ بگرێت. • من پشتم بەوە ئەستوورە و هۆکاری بەردەوامبوونیشم ئەوەیە کە زۆربەی خەڵکی کوردستان و هاوڕا و پاڵپشتمن و ئەوان بوونەتە هێز بۆ ئەوەی من بەردەوام بم. • زۆر له‌و شتانه‌ خه‌تای ئێمه‌ نه‌بووه‌، هه‌ندێ له‌و قه‌یرانانه‌ دروست كراون، به‌شێكی له‌سه‌ر ئاستی ناوخۆیی، یاخود بڵێم ئه‌و كه‌سانه‌ی كه‌ به‌رژه‌وه‌ندییه‌كانیان لێدرا یان هه‌ستیان به‌ مه‌ترسی ده‌كرد، كه‌وتنه‌ جووڵه‌ و دژایه‌تیكردنی ئه‌م حكومه‌ته‌، به‌شێكی دیكه‌ش له‌ ده‌ره‌وه‌ی حكومه‌تی هه‌رێمی كوردستان هه‌وڵی زۆریان دا بۆ ئه‌وه‌ی فشاری ئابووری و یاسایی و ئه‌منی بۆ ئه‌م حكومه‌ته‌ بهێنن، تاكوو نه‌توانین له‌ ئه‌ركه‌كانمان سه‌ركه‌وتوو بین. • من دژی سلێمانی نیم و دژی هیچ شوێنێکی کوردستان نیم، قبووڵ ناکەم وا نیشان بدرێت، با ڕێگە بدەن من بێم ئەو خزمەتەی دەتوانم لێرە بیکەم لە سلێمانی بیکەم، بزانن بەچاوان لە سلێمانی نایکەم، بەڵام کە ڕێگریم لێ دەکەن، نایەڵن. • بۆ بەرژەوەندیی تەسکی حیزبی و شەخسی ڕێگری دەکەن لەوەی کە حکومەت خزمەتی سلێمانی و شوێنەکانی تر بکات، با خەڵک گلەیی لەو ڕێگرانە بکات. • من دەمەوێت خزمەتی هەموو ناوچەکانی کوردستان بەبێ جیاوازی بکەم. • سەرەڕای هەمو تێبینییەک، بەڵام من بەڵێنم دا گوتم نانێکمان هەبێت لەگەڵ سلێمانی نیوەی دەکەین، لەو کاتەی کە ئێمە ئەو بڕیارەمان دەدا ئەو ناپاکییە دەکرا بەرانبەر بە هەرێمی کوردستان و داوا لە لایەنە توندڕەوەکانی بەغدا دەکرا کە سلێمانی لە کوردستان جیا بکەنەوە. • ئەو کەسانەی بەرپرسن لە بەڕێوەبردنی سلێمانی غەدریان لە سلێمانی و خەڵکی سلێمانی کرد، بەجۆرێکی تر ڕەفتاریان بە سەروەت و سامانی خەڵکی سلێمانییەوە کرد، پارەی خەڵکی سلێمانی بۆ خەڵکی سلێمانی بەکار نەدەهات، بۆ بابەتی تایبەت و ئامانجی تایبەت بەکار دەهات. • مەترسی لەسەر سلێمانی لە هەولێر نییە، مەترسی سەر سلێمانی لەو شوێنانەیە کە بەشێوازێکی شۆڤێنیانە لەگەڵ کوردستان مامەڵە دەکەن، ئەو هاوپەیمانێتییەی ئەوان کردیان مەترسییە لەسەر سلێمانی، هەولێر پایتەختی کوردستانە و بەچاوێک سەیری هەموو کوردستان دەکات، سلێمانی گلێنەی چاوی ئێمەیە بەهیچ شێوازێک واز ناهێنن بەبێ جیاوازی خزمەتی هەموو شارەکانی کوردستان دەکەین.