Bəxtiyarlı və Məmmədli kənd qəbiristanlıqlarında təmizlik işləri aparıldı, qəbirlər nömrələndi!

Qubadlı rayonunun yenidən qurulması, işğaldan azad edilmiş ərazilərin bərpası və bölgənin su resurslarından səmərəli istifadə edilməsi məqsədilə inşası planlaşdırılan Yeni Bərgüşad su anbarının tikinti sahəsi ilə bağlı mühüm və həssas hazırlıq işlərinə başlanılıb. Azərbaycan Respublikasının Prezidenti cənab İlham Əliyevin rəhbərliyi ilə Qarabağ və Şərqi Zəngəzurda həyata keçirilən irimiqyaslı quruculuq layihələrinin tərkib hissəsi olan bu proses çərçivəsində, su anbarının altında qalacaq Bəxtiyarlı kəndinin ərazisində yerləşən Bəxtiyarlı və Məmmədli kənd qəbiristanlıqlarında genişmiqyaslı təmizlik və qeydiyyat işləri aparılıb. Bu mühüm işlər Qubadlı rayon İcra Hakimiyyətinin başçısı, rayonun ağsaqqalı hörmətli cənab Malik İsaqovun tövsiyəsi və yaxından dəstəyi ilə baş tutub. Eyni zamanda, Şərqi Zəngəzur iqtisadi rayonunda Azərbaycan Respublikası Prezidentinin xüsusi nümayəndəliyinin əməkdaşları da əraziyə baş çəkərək görülən işlərlə yaxından tanış olublar. Yerli sakinlər üçün böyük mənəvi dəyər daşıyan bu məkanlarda qəbirlərin tam təhlükəsiz və dini-mənəvi qaydalara uyğun şəkildə başqa bir əraziyə köçürülməsini təmin etmək məqsədilə ilkin mərhələ uğurla icra olunub. Keçirilən tədbirlər zamanı: Hər iki qəbiristanlığın ərazisi kol-kosdan və tullantılardan tam təmizlənib; Gələcək köçürülmə prosesinin dəqiq, qarışıqlıq olmadan və hər bir ailənin mənəvi haqqı qorunmaqla idarə edilməsi üçün qəbirlər tək-tək nömrələnərək inventarlaşdırılıb; Köçürülmənin həyata keçiriləcəyi yeni təhlükəsiz ərazinin müəyyənləşdirilməsi və texniki hazırlıqların görülməsi istiqamətində addımlar planlaşdırılıb. Prezident İlham Əliyevin hər bir vətəndaşın mənəvi dəyərlərinə, tarihi yaddaşına və keçmişinə verdiyi yüksək qiymət və həssaslıq bölgədəki hər bir addımda özünü büruzə verir. Dövlətimizin həyata keçirdiyi bu nəhəng infrastruktur layihələri fonunda, doğma torpaqlarımızda uyuyan soydaşlarımızın xatirəsinə göstərilən bu xüsusi diqqət Qubadlı sakinləri tərəfindən böyük ehtiram və minnətdarlıqla qarşılanır. Təmizlik və nömrələnmə işləri köçürülmə prosesinin tam mütəşəkkil və qüsursuz idarə olunmasına zəmin yaradır. ____________________ Vüqar Calaloğlu. 17.06.2026