Mama atumbikiza kichanga kwenye shimo la choo Moshi

Moshi. Mwanamke mmoja, mkazi wa Mtaa wa Sabasaba, Kata ya Rau, Wilaya ya Moshi, mkoani Kilimanjaro, anayefahamika kwa jina la Scholastica Ngowo (32), anashikiliwa na Jeshi la Polisi kwa tuhuma za kutoa mimba na kutupa kichanga kinachodaiwa kuwa na umri wa takribani miezi saba kwenye shimo la choo. Inaelezwa kuwa mwanamke huyo ambaye ni mama wa watoto wanne alikuwa ni mjamzito na kwamba kwa siku kadhaa hakuonekana mtaani hapo mpaka hapo ilipobainika kuwa amejifungua kichanga hicho na kukitupa chooni. Kamanda wa Jeshi la zimamoto na uokoaji mkoani hapa, Jeremiah Mkomagi amethibitisha kuopolewa kwa kichanga hicho leo ambacho amesema kilitolewa kwenye shimo hilo tayari kikiwa kimefariki. Akizungumzia tukio hilo, mama mzazi wa binti huyo, Elizabeth Ngowo amesema tukio hilo limemhuzunisha sana na ni tukio la ukatili na kwamba halipaswi kufanywa na jamii. Naye, diwani wa kata hiyo, Stallone Malinda amesema tukio limewashangaza sana na kuonyesha ni namna gani ambavyo jamii imekosa hofu ya Mungu kwa kufanya matukio hayo ya kikatili na ya kinyama.