Gwadar: Baloch national gathering

بلوچ راجی مُچی ءِ اکس:  کے مکرانی ءُ کے کوہِ سلیمانی؟ دو سال پیسر 28 جولائی ءَ بلوچ راجی مُچی ءِ جار جنگ بوتگ اَت۔ ھزارانی ھساب ءَ کاروان چہ کوہِ سلیمان، سندھ کراچی، شال ءُ جھلاوان دیم پہ گوادر ءَ رھادگ بوت اَنت۔ گوادر ءَ دو روچ پیسر انٹرنِٹ بند کنگ بوت ءُ پد ءَ 27 جولائی ءَ موبائل سروس ھم بیگواہ بوت اَنت۔ ھال اَتک کہ گوادر ءَ چہ ڈن دراھیں راہ ھم گَٹ کنگ بوتگ اَنت۔ تُرس ءِ جاور وَ چہ 27 جولائی ءَ پدّر بوت اَنت۔ جار نہ جتگیں کرفیو جَنَگ بوتگ اَت۔ شھر ءَ ھر گور ءَ سپاھی گشت ءَ اِت اَنت۔ سرکاری سُر پُر گُش ئے سر ئے وت نہ اِتاں۔۔۔۔ بَلے 28 جولائی ءِ سھب ءَ من چہ لوگ ءَ دراتکاں داں دگ ھاموش اَنت۔ بازار بند اِنت۔ ھر نیمگ ءَ گندئے داں سپاھی گوں لَٹ ءُ سلاھاں ترّگ ءَ اَنت۔ جاھے جاھے دمکانی تہ ءَ مردمانی کسانیں مُچی یے سر کشیت بَلے چہ تُرس پدا ٹپ اَنت۔ مردمانی اولی مُچی سید ھاشمی چار راہ ءَ گِندگ بوت کہ ادا سپاھیگ چو دلوتانی وڑ ءَ مردماں گِرگ ءُ گِرینگ ءُ گاڑیاں کنگ ءَ اِتاں۔ منی گوادر پریس کلب والا کارڈ گوں موبائل ءَ ھمدا آوار جَنگ بوت۔ اے مردم کہ گرینگ ءُ دزگیر کنگ بوتگ اِتاں گیشتر چہ گالوار ءَ پدر اِتاں کہ چہ ڈنّ ءَ اتکگیں بلوچ انت۔ اِشاں کجا بَر اَنت ءُ پدا گوں اشاں چے بیت۔۔۔ ھدا بزانت۔۔۔ شھر سرجم ءَ بند اَت۔ داں نیمروچ ءَ پَد یک اناگہ ءَ زالبول ءُ زھگاں سید ھاشمی چار راہ ءَ اُرش کُت ءُ نندانک دات۔ نوں بلوچ زِر ءِ دامن چہ گَل ءَ شات اَت۔ ھما گوادر کہ چہ وتی نپ ءُ سیت، لالچ ءُ ووٹاں رَند سنٹ کنگ بوتگ اَت یکبرے پدا دراتکگ اَت۔ باتیل ءِ سینگ چہ پھر ءَ بُرز اَت کہ اے مردمانی مُچی پہ نپ ءُ بے لالچ دراتکگ اَت۔ ھمایاں کہ مات ءِ شیر ءِ سوگند وارتگ اَت ءُ شھیدانی نام ءِ چوک ءُ چارھانی سودا کُتگ اَت۔ آ ھم ھئیران اِتاں کہ اے کساس ءَ چہ مھلوک کجا پیداگ اَنت۔ بیگاہ ءِ سے ءَ سپاھیگاں سید چار راہ ءِ سر ءَ اُرش کُت۔ تیر گواری، لَٹ شاپی ءُ ارسی گیس چگل دیگ بوت۔ شھر سرجم ءَ یک نیمگے چہ تیرانی تواراں جکسگ ءَ اَت، ءُ ارسی گیسانی دوت بال اِتاں ءُ دومی نیمگ ءَ نعرہِ بلوچستان ءِ اوگامانی توار اَت۔ ادا بلوچستان ءِ اوگاماں باج بُرت۔ پدا مردم پدی زِر ءَ راجی مُچی جاہ ءَ مُچ بوت اَنت۔ ھال اَتک درزنے ءَ گیش مردم ٹپّی بوتگ اَنت ءُ یک ورناھے شھید بوتگ ءُ آئی ءِ میّت چہ جی ڈی اے نادراہ جاہ ءَ آوار جَنگ بوتگ۔  اگاں زوراکی مہ بوت ایں بہ گندئے راجی مُچی یکیں روچ ءَ آسر بوتگ اَت۔ لھتیں تران ءُ اوگام کمو گریوگ ءُ کُکار بوتگ اَت۔ بَلے ریاستی منسوبہ ساز ءُ جنگی نپ واراں ھساب ءُ کتاب جَتگ اَت کہ پدی زِر ءِ دامن ھونین بہ بیت۔  بیگاہ ءَ بلوچ راھشوناں تران کُت ءُ نندانک دیگ بوت۔ اے لوٹ کنگ بوت کہ شھید بوتگیں ورناہ ءِ میت آجوہ کنگ بہ بیت ءُ نندانک ءِ جاہ ءَ آرگ بہ بیت ءُ دزگیر کُتگیں مردم یلہ کنگ بہ بنت۔ شپ بوت۔ گوادر ءِ لوگ لوگ ءَ سپاھیگ مان رِتک اَنت۔ مردم جَنگ، تُرسینگ ءُ برگ بوت اَنت۔ شھر ءِ آپ، لئین بند کنگ بوتگ اِتاں۔ دومی روچ ءَ شھر ءِ تنکیں میتگاں تہ آپی ءَ سرکش اِت۔ زالبول لھتیں پہ آپ ءِ شوھاز ءَ تچگ ءَ اِتاں، لھتیں وتی چُکّانی شوھاز ءَ ءُ لھتیں نندانک ءِ جاہ ءَ۔ شھر نوں سرجم ءَ کربلا اَت۔ دومی روچ ءَ نیمروچ ءِ ٹھک ءَ یک ءُ نیم ءَ پدا سپاھیگ اُرش کناں۔ ترندیں بکتر بند، سدانی کساس گوں لَٹاں پادانیں سپاھیگ ، ءُ تیر گواری ءُ ارسی گیسانی جمبرانی سیاھی مان شانیت۔ دو نیم ءَ سپاھیگ یک انھگہ ءَ کاینت۔  اے زوراکی چہ پیسری زوراکیاں ترند تِر بیت۔ دمکانی تہ ءَ زالبول سر دَر ءُ پادشپاد تچگ ءَ اَنت۔ اسٹیج ءِ گاڑی ءُ تمبواں سپاھیگ مان دار اَنت۔ گاڑی ءُ موٹر سائیکلاں پروشنت۔ شھر ءَ فیک نیوزانی توپانے کیت۔ ھرکس ءَ گندئے چم اِش سھر اَنت ءُ دم توس اِنت۔ ھما مردم کہ بے ھوش بوتگ اتنت ھرکس اشاں کپگ ءَ گندیت گُشیت شھید بوتگ اَنت۔ پدی زِر میرین ڈرائیو ءَ سپاھیگ وتی دست ءَ کن اَنت۔ یک سپاھیگے ھم کُشگ بیت۔ چہ دروگیں ھالاں کسے گُشیت پلاں راھشون شھید کنگ بوتگ، کسے گُشیت پِلاں جاگہ ءَ دو جنین آدمانی لاش کپتگ اَنت۔ نندانک جاہ ءِ راہ سرجم ءَ گَٹ اِتنت۔ دمکانی تہ ءَ چمپل، سریگ ءُ چادر کپتگ اِتاں۔ کئی چُک کے ءَ بڈ ءَ اِنت ءُ کئی گُشان کے ءَ سر ءَ اَت۔۔۔ کیامت اَت۔ کئی لوگ ءَ سر کپتگیں مردم جھلاوان ئیگ اَت یا سندھ ءُ بولان ءِ گوادر ءَ اے پرک ءُ دَر ھلاس اَت۔ پرک بس ھمیش اَت کہ یک نیمگے بلوچ اِتنت ءُ دومی نیمگ ءَ سپاھیگ۔  راہ ءُ دَر بند اِتاں۔ نزیک تریں ھال کہ اتک اَنت آ چہ سُربندن ءَ کہ دو روچیں مردم سُربندن کراس ءَ سپاھیگاں داشتگ انت۔ چہ شُد گُژن زھگ ءُ زالبول سدانی کساس ءَ نندوک اَنت۔ دومی روچ ءَ سربندن کراس ءِ مردم پادانی دیم پہ گوادر ءَ رھادگ بنت۔ چہ 22 کلومیٹر ءِ پادانی، شُد، ارسی گیسانی تہ ءَ وھدے روانک گھٹی ڈھور ءَ سر بیت گُڑا چہ پّشت ءُ دیم ءَ روانک ءِ سر اُرش کنگ بیت۔ زھگ ءُ زالبول، کماش ءُ ورناہ لَٹ دیگ بنت ءُ یک یک کنگ بنت۔  شھر ءَ ناں آپ ھست ناں ورگ۔  بَلے نعرہِ بلوچستان ءِ اوگام دلاں سیر کن اَنت۔  داں نوہ روچ پُرّیں گوادر شُد گِندیت، تُن گِندیت، ھون ءُ ارس گِندیت، بَلے ھما وشتریں ندارگ کہ باتیل ءِ سر چہ پھر بُرز بیت ءُ بلوچ زِر پہ مڑاھے چاریت آ ھمے ندارگ اِتاں کہ کے کوہِ سلیمانی کے مکرانی ءُ جھلاوانی؟ دُرس بلوچ اِتاں۔ گوادر بلوچستان۔ #gwadar #balochistan