சென்னை ராகு பரிகார தலம்| நாகேஸ்வரர் கோயில்| குன்றத்தூர்| Nageswarar Temple| Ragu sthalam| Kundrathur

அனைவருக்கும் வணக்கம். இன்றைய பதிவில், சென்னைக்கு அருகில் உள்ள நவகிரக கோயில்களில் ராகுவிற்கு உண்டான பரிகார தலத்தை பற்றி காண்போம். நவகிரகங்களில் நிழல் கிரகம் என கருதப்படும் ராகு பகவானை யோக காரகன் என்று அழைக்கிறார்கள். ஒருவரின் ஜாதகத்தில் ராகு நல்ல நிலையில் இருந்தால், அந்த ஜாதகர் நல்ல பலன்களை பெற்று சிறந்த வாழ்க்கை அமைய பெறுவார். அதுவே பாதகமான இடத்தில் அமைந்தால், ஜாதகருக்கு திருமண தடை, தொழிலில் நஷ்டம் போன்றவற்றை சந்திக்க நேரிடும் என்பது ஜோதிடர்களின் கருத்து. இதுபோன்ற தோஷ பாதிப்புகள் நீங்க, நாம் சென்று வணங்க வேண்டிய பரிகார தலம் குன்றத்தூரில் அமைந்துள்ள அருள்மிகு காமாட்சி அம்மன் சமேத நாகேஸ்வரர் திருக்கோயில். பெரிய புராணத்தை இயற்றி அதன் மூலம் 63 நாயன்மார்களின் வரலாற்றை உலகிற்கு அறியவைத்த சேக்கிழாரின் அவதாரத் தலம் குன்றத்தூர். 1000 ஆண்டுகள் பழமையான இத்தலம் சேக்கிழாரால் கட்டப்பட்டது. வடநாகேஸ்வரம் என்றும் அழைக்கப்படுகிறது. பிரார்த்தனைச் சிறப்பு: ராகு தசை ராகு புத்தி நடைபெறுபவர்கள், ஜாதகத்தில் ராகு தோஷம் உள்ளவர்கள், மூலவர் நாகேஸ்வரருக்கு நடைபெறும் ராகு கால பூஜையில் கலந்து கொண்டு அபிஷேகம் மற்றும் பூஜைகள் செய்வது சிறப்பு. இதன் மூலம் அனைத்து தோஷங்கள் நீங்கி, திருமண பாக்கியம், குழந்தை பாக்கியம், தொழில் முன்னேற்றம் மற்றும் நோய் நொடிகளில் இருந்து நிவர்த்தி ஆகிய பலன்களை அடைய முடியும் என்பது ஐதீகம். பக்தர்கள் தங்களின் ஜாதகத்தை நாகேஸ்வரரின் பாதத்தில் வைத்து அர்ச்சனை செய்து வேண்டி கொள்ளும் வழக்கமும் இங்கு உள்ளது. சேக்கிழார் மேற்கு நோக்கி தனி சன்னதியில் காணப்படுகிறார். மாதந்தோறும் பூச நட்சத்திர தினத்தன்று சிறப்பு பூஜைகள் மற்றும் வைகாசி மாதத்தில் சேக்கிழார், நாகேஸ்வரரை தரிசிக்கும் வைபவம் சிறப்பாக கொண்டாடப்படுகிறது. ஆலயத்திற்கு அருகில் சேக்கிழார் மணி மண்டபம் அமைந்துள்ளது. ஆலயநடை திறப்பு நேரம்: காலை 7 மணி முதல் 12 மணி வரை மற்றும் மாலை 5 மணி முதல் 8.30 மணி வரை. நாகேஸ்வரர் திருக்கோயில் சென்னையிலிருந்து சுமார் 28 கிலோ மீட்டர் தொலைவில் சென்னை புறநகர் பகுதி, குன்றத்தூரில் அமைந்துள்ளது. குன்றத்தூர் பேருந்து நிலையத்திலிருந்து சுமார் 1 கிமீ தொலைவில் உள்ளது. குன்றத்தூர் பஜாருக்கு வெகு அருகில் உள்ளது.