Report TV - Projektvendimi: Metalurgjiku, Bakri Telat dhe Azotiku, parqe industriale

Ish-Kombinati Metalurgiku i Elbasanit, ish-Azotiku i Fierit, Uzina e Rafinimit të Bakrit në Rubik dhe Uzina e Telave në Shkodër do të kthehen në parqe industriale. Propozimi vjen nga Ministria e Energjitikës dhe do të dërgohet për miratim në Qeveri në nëntor të këtij viti. Ministria e Energjitikës ka sqaruar se ky projektakt iniciohet me qëllim nxitjen e investimeve në këto zona. Institucioni thekson se një nismë e tillë do të bëjë të mundur rehabilitimin e tyre, për shkak se asetet janë degraduar e këto zona nuk kanë gjeneruar asnjë vlerë ekonomike. Kombinati Metalurgjik, përbëhet nga nje seri Uzinash, të cilat realizonin perpunimin e lëndës parë e mbetjeve metalike dytësore, për prodhimin e gizës dhe çelikut. Territori i gjithë Uzinës së Azotikut ka një sipërfaqe prej 22, 27 ha, në të cilen 0,52 ha është zënë me Landfillin e mbetjeve të rrezikshme ( arsenikale), ndërsa 4,05 ha janë objekte të privatizuara. E njejtë është edhe gjendja e Uzinnës së Bakrit në Rubik, një pjesë e mirë e së cilës është shitur për skrap. Një repart i uzinës së telave në Shkodër me rreth 40 punëtorë, ka qenë aktiv deri muajt e fundit. Por edhe ai ka mbyllur aktivitetin, mesa duket, i destinuar të pësojë rrënimin e pjesës tjetër të uzinës.