賣樓賣到入監？零首付系餡餅？發夢啦你！深圳七百中介被拉、銀行副行長落馬，高評高貸連環爆雷。業主以為賣樓甩難，點知一簽陰陽合同就變詐騙共犯。#房地產 #深圳買樓 #零首付 #經營貸

零首付？發夢啦你！七百個中介被拉，銀行副行長釘蓋落馬，深圳嗰條「高評高貸」嘅產業鏈，連環爆到渣都冇得剩。 而家賣樓？真系步步都踩鋼線，一唔留神，業主同地產仔就手拖手入去踩縫紉機，業主變階下囚，呢鑊邊個孭得起啊？好多人直到差佬叔叔將副靚鋃鐺扣上手腕嗰刻，個腦都重系「嗡嗡」聲，口窒窒嗌冤：我冇做錯嘢啊，賣自己間屋咋嘛，點解會犯法?？你唔好唔忿氣，呢單高評高貸，講穿咗就系違法，冇得拗頸。若然你而家掛緊牌急住甩手，突然有個地產仔打嚟密過你阿媽，把口甜過碗糖水，嗌到你暈：大哥大姐，終於等到你啦！我有個客對你間屋一見鍾情，非卿不娶，但系想玩零首付。你即刻要拎起個耳仔，繃緊條神經，千祈唔好比「零首付」三個字沖昏個腦，嗰啲邊系餡餅啊？直頭系鐵餅！掟中個頭起高樓，嚴重點就系法律嘅鐵窗等你嘆。 等我同你拆解下呢個局點樣做，你聽真啲，呢度啲水有幾深。假設你喺深圳有間頂層單位，家陣市道有幾慘澹大家都心照，層數差少少，掛足大半年都冇個問價，你急到好似熱鍋上嘅蟻咁，氹氹轉。冇啦，地產仔奪命call到，話有客睇中，捱完半日鋤價，最後撲鎚六百萬成交。你心頭大石終於放低，以為甩難？停！好戲依家先上演。地產仔話鋒一轉，話個買家手頭緊，想玩零首付。點玩呢？呢個屋苑同戶型好層數舊年成交價八百萬，地產仔喺銀行有內鬼，有辦法將你間頂樓都做到八百萬。按八百萬計，貸八成半，批到六百八十萬。呢鋪玩完，買家一毫子首付都唔使出，重可以喺度撬到八十萬現金出嚟。你睇，買家空手套白狼，地產仔賺到笑，你間屋又賣到，好似三贏咁靚仔。 為咗做呢單大茶飯，買家要先借百二萬擺入監管戶口扮首期，銀行睇到「首期」到咗，啪！六百八十萬貸款過埋數，搞掂過戶，銀行將八百萬過落你戶口。跟住地產仔叫你即刻將多出嗰兩百萬過返比買家，你袋袋平安六百萬，買家揸住剩低嗰幾十萬，爽歪歪去嘆世界。齊齊發？發你個大頭鬼！呢啲就系正宗攞景贈興，挖坑比自己踩。你哋簽嗰份合同，比銀行睇嗰份系八百萬嘅「陽合同」，枱底簽嗰份先系六百萬嘅「陰合同」，呢啲叫乜？呢啲就系陰陽合同，系赤裸裸嘅金融詐騙，系呃貸款！你以為收咗錢就玩完？嗰個只系惡夢嘅開始。 東窗事發只系遲早，冇可能走得甩。第一種，個買家根本唔似有本事供樓嘅人，平時首期都儲唔到，家陣突然手揸幾十萬，唔擸到盡至奇？餐餐大魚大肉，買靚煙換新電話，洗腳唔抹腳。唔使兩個月，供樓斷纜。斷供？銀行系乜嘢地方？同錢打交道架嘛！風控部班人個個都系人精，一查數，咦？做乜業主收八百萬轉頭就過兩百萬比買家？呢鋪唔系夾埋做假評估系乜？即刻報警。差佬一殺到，陰陽合同擺上枱，人贓並獲，買家業主地產仔，一個都走唔甩，全部涉嫌詐騙。涉案金額幾百萬，呢啲唔系小數目，食幾年皇家飯全睇銀碼大細，肯定夠你嘆番幾壺。 第二種更絕，就算個買家砸鍋賣鐵勒緊褲頭死頂月供，一日都唔敢逾期。銀行一樣會翻舊賬，家陣金融監管幾嚴啊？大數據一Run，資金流向一清二楚，你戶口嗰筆兩百萬轉賬，黑夜裡邊嘅螢火蟲咁，一揪就出。銀行重理得你還得起定還唔起，你呢個行為本身就已經系呃貸款，系違規，直接㩒住。嗰啲覺得自己好冤枉嘅業主，你聽下佢哋辯解幾好笑：間評估公司系你哋銀行自己搵?！個價系你哋定?！間屋又唔系我叫佢值八百萬，點解我犯法？呢番說話你留返同法官講啦，睇下個官笑唔笑得出。你配合買家做假合同、假交易，呢啲唔系詐騙系乜？地產仔都嗌冤，話自己跑上跑下，佣金得雞碎咁多，點解要陪葬？你明知系違規重做扯皮條，呢啲就叫共同犯罪，抵死！買家更委屈，話成條街都系零首付廣告，啲發展商重嗌零月供零裝修，點解拉我唔拉佢哋？哼！人哋系促銷手法，最多踩界啫，你直接偽造合同呃銀行錢，性質一樣咩？呢個唔系五十步笑百步，系五十步笑五百步，送死！ 你話幾滑稽？成只馬騮照鏡，里外都唔系人。佢哋覺得自己冤過竇娥。不過法網恢恢，疏而不漏，呢個年頭，邊個同你講「法不責眾」？舊日曆啦！家陣系你敢伸手，就敢斬你。尤其系銀行入面嗰個內鬼，落咗馬嗰位副行長，先至系最抵死嗰個。佢揸住啲權力，同出面啲野中介勾三搭四，一擔擔，將國家嘅信貸資金當私家提款機，風險控制當廢紙。佢唔死，天理難容！ 單嘢爆出嚟，成個樓市人心惶惶，仲驚過墳頭鬼火。而家賣樓，一唔小心，業主同地產仔就手拖手去食牢飯。間屋？家陣唔系資產喇，直頭系計時炸彈，掂親都爆。以前合埋眼買樓，攤喺度都賺嘅日子，正式一去不復返。而家啲樓價，尤其系嗰啲舊樓、斜頂、底樓，王小二過年，一年差過一年。你想掛八百萬？發夢啦！六百萬賣得甩都要還神！偏偏有啲唔死心嘅，重想玩高評高貸嘅旁門左道，結果呢？全軍覆沒。 呢鋪拉人，拉嘅唔單止系七百條友、一個副行長，系打爛埋成個樓市最後嗰塊虛幻嘅麵皮。佢話畀所有人知，唔好耍小聰明，唔好鑽空子，唔好以為得你精。嗰啲玩槓桿嘅，借到盡嘅，家陣全部腳軟。樓價唔使點郁，佢哋個心臟就停幾秒。斷供嘅銀主盤，多過雨後春筍，一間跟一間咁爆出嚟。個價？跌到你不忍直視，睇多眼個心都滴血。 以前大家見面，問「食咗飯未」？家陣見面，要壓低聲線，好似地下黨接頭咁問：「你間屋……冇事啊嘛？」冇事？冇事就系最大嘅好事！只要你沾過嗰啲高評高貸，或者心郁想執平貨零首付，你夜晚瞓覺都要擘大隻眼，聽嚇外面有冇警笛聲。呢個樓市，霜打茄子咁，徹底謝咗。 呢場風暴，絕對系滅頂之災，唔系過雲雨。佢將成個借貸行業條底褲都剝埋落嚟，等大家睇清楚，底下嗰壇嘢有幾肉酸。野蠻生長？舊時嘅事啦！家陣講嘅系規矩，系合法合規，系收皮做人！嗰啲地產仔，唔敢再拍心口同你吹「實批到」嘞，嗰啲業主，唔敢再簽陰陽合同嘞，嗰啲買家，聽到「零首付」三個字，仲驚過見鬼，成個彈起。 所以話，而家嘅樓市就系風雨飄搖，慘過賣鹹鴨蛋。你以為劈價賣樓就系底線？太天真喇！家陣分分鐘要入去食皇家飯。你以為零首付系撈底上車？系抄家至真！將自己副身家，連埋下半世都掟落去。呢啲邊系買樓？系玩命，系簽生死狀！呢個高評高貸嘅泡沫一篤爆，血光四濺，一地雞毛。銀行嘅雷霆手段，就系要話畀全世界知，唔好同我玩嘢，否則實冇好結果。呢排，無論系買樓賣樓定系做中間人，全部要識做，腳踏實地做人，老老實實搵食，唔好成日諗埋啲旁門左道。 嗰啲重想靠層樓一朝發達嘅，快啲醒啦！天都光曬啦重發緊夢？呢個市場已經唔系以前嘅市場嘞，家陣跌親條針都聽得見，少少風吹草動就嚇走成村人。慘？系慘絕人寰。但呢個慘，系自找嘅，系市場回歸理性嘅陣痛，系畀嗰啲投機分子一記響亮嘅耳光，清脆到呢！我哋普通老百姓，最緊要揸實個荷包，食住花生睇戲，最多感嘆句：呢個世道，樓唔系樓，系枷鎖；貸款唔系貸款，系催命符。好自為之啦！