WOWE UBIBONA UTE? IMANA YO IBIVUGAHO IKI?

Hari imihango myinshi twasanze ikorwa n'abatubanjirije ariko kandi natwe twayigendeyemo igihe kitari gito nyamara Imana igaragazako iyo mihango itabasha kugira icyo ifasha abayikora. Wowe ubivugaho iki? Ese ijambo ry'Imana ryo ribivugaho iki? Ubutumwa bwiza nibwo mucyo w'abari mu isi, nibwo budukura mu rujijo tuba turimo n'iyo twaba turi mu bintu byemerwa n'abantu benshi ariko burya iyo bidahura n'ukuri kw'ijambo ry'Imana tuba dukwiriye kubireka tukemera ukuri kw'ijambo ry'Imana. Bimwe mu byo benshi bemera ariko bitari ukuri harimo no kuba umuntu upfuye agize uwo yaturira ibyaha yaba agiye mu ijuru. Ibi bishishikaza benshi ku buryo usanga iyo umuntu amaze gupfa hari abahita bihutira kumenya niba hari uwo yaba yabashije kwaturira ibyaha, nyamara by'ukuri uko yaba yabyatuye kose ntacyo byahindura ku hantu ari bujye kuko inzira yo kubabarirwa ibyaha ntabwo inyura mu kubibwira abandi. Hari n'ubwo mu gushyingura uwapfuye usanga hari uri butange ubwo buhamya bwanyuma bw'uko yaba yapfuye hari uwo yaturiye ariko ibyo byose ntabwo ari byo ntan'icyo bimara rwose. Si ibyo gusa ahubwo hari no kuba umuntu ajya gupfa bagahamagara umuyobozi we muby'Imana ngo amuvugireho amasengesho yanyuma ari nayo gusigwa kw'abarwayi ariko ibyo byose ntacyo bifasha uwamaze gupfa. si ibyo gusa na none ahubwo habaho no kuba uwapfuye aba agomba kunyuzwa mu rusengero kugira ngo umurambo we uvugirweho amasengesho ndetse hanaririmbwe indirimbo z'Imana n'indi mihango iba yateguwe ariko ibyo byose ntacyo bifasha uwamaze gupfa kuko ugenda aba yagiye kare ikiba kiri aho ni umubiri kandi burya umubiri siwo muntu. Gusabira misa abapfuye nabyo ni ikinyoma kimaze igihe kirekire ndetse banazitangaho amafaranga ariko by'ukuri ntacyo bifasha uwo basabira misa. Hari n'ubwo bavuga ko bituma uwapfuye yakoroherezwa muri purigatori ariko nabyo ntacyo bimaze rwose. Umuntu yizera Yesu Kristo akiriho akizera ko yababariwe ibyaha bye byose kubwa Yesu akabaho azi neza ko iwabo ari mu ijuru bidashingiye kubizabaho ku munota wa nyuma.Sangiza abandi ubu butumwa bwiza kugira ngo abari mu rujijo bakomeze kurukurwamo.