Ақтөбеде қарақұрт шаққан әйел өлім аузынан қалды

Ақтөбеде қарақұрт шаққан әйел өлім аузынан қалды. 48 жастағы Эльвира Опинаға улы жәндік аулада жүрген кезде жабысқан. Ең сорақысы, ауырып барған науқасқа дәрігерлер мүлдем басқа диагноз қойып, неврология бөліміне жатқызды дейді туыстары. Соның салдарынан келіншектің жағдайы күрт нашарлапты. Енді жақындары жұмысына салғырт қараған ақ халаттыларды жазалауды талап етеді. Туыстарының айтуынша, Эльвира Опина үйінің ауласында арамшөп жұлып жүрген кезде аяғынан қарақұрт шағып алған. Арада небәрі 10 минут өткенде әйелдің белі қатты ауырып, қан қысымы көтеріліп кеткен дейді. Жақындары бірден жедел жәрдем қызметін шақырып, ауруханаға жеткізеді. Бірақ емдеу мекемесіндегі дәрігерлердің әрекеті әпкесінің ашуын туғызыпты. ФАЙРУЗА ФЕРОЗ, науқастың әпкесі: Сіңілім «мені қара бір нәрсе шағып алды» деді. Үстінен қағып жіберген. Ал ауруханадағылар «қарақұртты банкаға салып алып келуіңіз керек еді», – деді. Бұл күлкілі, ақылға қонбайтын нәрсе ғой. Қарақұртты қалай банкаға салып әкелемін? Ол құмырсқа емес, зертханаға апаратын талдау емес. Ең сорақысы, ақ халаттылар науқасты неврологиялық бөлімге жатқызды дейді жақындары. Жеті сағат палатада жаны қиналған жанға ешкім көмек көрсетпеді деп отыр. Салдарынан 48 жастағы әйел жансақтау бөлімінен бір-ақ шыққан. ФАЙРУЗА ФЕРОЗ, науқастың әпкесі: Түнде әпкем хабарласып «мен таңға дейін аман қалмайтын шығармын. Балаларыма бас-көз бол, кішкентай егіздеріме қара» деп жылады. Содан кейін мен неврология бөліміне қайта-қайта қоңырау шалдым. «Сіз дәрігерсіз ғой. қарақұрт шаққандағы барлық белгілерді көріп тұрсыз. Егер таңға дейін оған бірдеңе болып қайтыс болса, барлығыңызды жауапқа тарту үшін күшімді саламын дедім. Дәл осы сөздерден кейін науқасқа уға қарсы дәрі егілген. Қазір туыстары дер кезінде диагноз қоя алмай, қажетті ем көрсетпеген дәрігерлерді жауапқа тартуды талап етіп жүр. Ал аурухана басшылығы қарамағындағы қызметкерлерге шаң жуытпады. ҚАДЫРБЕК ИМАНБАЕВ, №1 Ақтөбе қалалық көпсалалы ауруханасының басшысы: Науқаста келіп түскен кезде белдің ауырсынуы, шап аймағындағы ауырсыну, әлсіздік диагноздарымен келеді. Диагностикалық жаңағы шаралары жасалғаннан кейін неврология бөлімшесіне жатқызылады. Енді динамикалық бақылау барысында науқасты шағу белгілерінің ұлғаюына байланысты, ауырсынудың басылмауына байланысты реанимация бөлімшесіне көшіріледі. Сол жерден барлық тиісті ем жүргізіледі. КӘМШАТ ҚОПАЕВА, тілші: Дәрігерлердің айтуынша, қазір науқастың жағдайы қалыпты. Оған тиісті медициналық көмек көрсетіліп жатыр. Бірақ Эльвира Опинаның мұндай жағдайға түсуіне ақ халаттылар кінәлі дейді туыстары. Сондықтан олар құзырлы органдарға шағымдануды жоспарлаған. #Информбюро #31арна #БастыЖаңалықтар #Новости #31канал