"BUJQESIA NE DUMRE" Një thesar i gjallë i bujqësisë Shqiptare.

Mes gjelbërimit dhe tokës pjellore të fshatit Hardhi në Belsh, Qendra e Resurseve Gjenetike është kthyer në një thesar të gjallë të bujqësisë shqiptare. Nën drejtimin e prof. Fetah Elezi, kjo qendër ruan me fanatizëm farat autoktone dhe traditën e kultivimit shqiptar. Gjatë vizitës sonë, profesori na prezantoi me dhjetëra varietete drithërash, nga gruri, elbi dhe thekra, deri tek okra e kultura të tjera tradicionale që prej vitesh kultivohen në tokat shqiptare. Çdo parcelë mbart historinë e saj, ndërsa çdo farë ruan vlerat dhe identitetin e bujqësisë së dikurshme. Më tej, vizita vijoi në parcelat me perime të shumllojsme, ku ngjyrat dhe aromat e natyrës ndërthureshin me punën e palodhur të specialistëve të qendrës. Profesori theksoi se misioni kryesor është ruajtja, shtimi dhe përhapja e farave autoktone, të cilat përbëjnë një pasuri të çmuar kombëtare. Në një kohë kur shumë varietete tradicionale rrezikojnë të zhduken, kjo qendër në Hardhi mbetet një shembull i përkushtimit dhe dashurisë për tokën, bujqësinë dhe trashëgiminë shqiptare.