લૉસ એન્જેલસમાં ICEની ઠેકઠેકાણે રેડ પડતાં શહેરમાં જોરદાર હોબાળો

જૂન મહિનાની શરૂઆતથી જ ICE દ્વારા રોજેરોજ અરેસ્ટ કરાતા અનડોક્યુમેન્ટેડ ઈમિગ્રન્ટ્સની સંખ્યામાં મોટો ઉછાળો આવ્યો છે ત્યારે અમેરિકાના કેટલાક શહેરોમાં ICEની આક્રમક કાર્યવાહીનો મોટાપાયે વિરોધ પણ થઈ રહ્યો છે. હાલમાં જ શિકાગોના સાઉથ લૂપમાં ICEની ઓફિસ સામે મોટી સંખ્યામાં એકઠા થઈ ગયેલા લોકોએ ભારે હોબાળો કર્યો હતો ત્યારે હવે લોસ એન્જેલસમાં પણ કંઈક આવા જ દ્રશ્યો જોવા મળ્યા હતા. અમેરિકન મીડિયાના રિપોર્ટ્સ અનુસાર ICEના એજન્ટ્સે શુક્રવારે LAમાં આક્રમક કાર્યવાહી કરી હતી જેના કારણે લોકોમાં ભય ફેલાયો હતો અને સેંકડો લોકો રસ્તા પર ઉતરી આવ્યા હતા. LAમાં થયેલી ICEની કાર્યવાહીના કેટલાક વિડીયો વાયરલ થયા છે જેમાં વેસ્ટલેકમાં આવેલા હોમ ડેપોના પાર્કિંગમાં ICEના એજન્ટ્સ લોકો પાછળ દોડતા જોવા મળે છે. આ વિડીયો જેણે ઉતાર્યો હતો તે વ્યક્તિ સ્પેનિશમાં લોકોને વોર્નિંગ આપે છે કે, ઈમિગ્રેશન ઓફિશિયલ્સ આવી ગયા છે અને અહીંથી ભાગો.