Daçiq: UÇPMB-ja si 'Al Kaeda'

Kryeministri serb Ivica Daçiq porositi shqiptarët e Preshevës se Serbia nuk është shtet 'banane' apo i dobët siç tha ai, që të tolerojë veprime të jashtëligjshme, sikurse ai i vendosjes së lapidarit të UÇPMB-së. Daçiq madje krahasoi lapidarin e UÇPMB-së në Preshevë, me vendosjen e përmendores së Al Kaedës në Nju Jork apo të ndonjë grupi terrorist në Spanjë apo Londër. "Serbia nuk është Republikë Banane, ajo ka ligjet e saj. Nëse në Nju Jork ekziston përmendorja e Al Kaedës, apo përmendorja e grupeve terroriste në Spanjë apo Londër, unë nuk mund ta komentojë këtë, por kjo për mua nuk është gjë tjetër veçse provokim ndaj Serbisë. Në Preshevë ka 22 përmendore të UÇK-së, UÇPMB-së dhe kështu me radhë, shteti ka heshtur derisa nuk u vendos ajo përmendore në qendër të Preshevës përpara objektit të Komunës. Kjo nuk është e mundur..nuk ka asnjë lidhje me të drejtat dhe liritë e njeriut. Shteti është shtet, ekziston dialogu përse nuk kanë kërkuar leje për vendosjen e përmendores. Unë nuk kam kërkuar asgjë që nuk ekziston në shtetet e tjera në botë. Uë nuk e di se si janë rregullat në Maqedoni por te ne ligji është i qartë", deklaroi Ivica Daçiq, kryeministër i Serbisë. Ndërkaq i pyetur nga Alsat, se kur shqiptarët e Preshevës do t'i gëzojnë të drejtat e njëjta që gëzojnë serbët në Kosovë, Daçiq me një dozë cinizmi tha se kjo do të ndodh atëherë kur serbët do t'i gëzojnë ato në Kosovë. Kryeministri serb gjithashtu duke nënvizuar angazhimin e tij rreth zgjidhjes së çështjes së Kosovës tha se ky problem nuk mund të zgjidhet sa kaq liderët shqiptarë nuk duan të bisedojnë për territore. "Ju e dini për çfarë angazhohem unë kur bëhet fjalë për zgjidhjen e problemit të Kosovës dhe Metohisë. Ju duhet të ju drejtoheni liderëve shqiptar pasi ata nuk duan të bisedojnë, nuk duan të lidhin çështjen e njërit territor me territorin tjetër sepse nuk guxojnë nga perëndimi", u shpreh Ivica Daçiq, kryeministër i Serbisë. Kryeministri serb Ivica Daçiq i cili u prit me nderimet më të larta shtetërore dhe ushtruake sot në Shkup, komentoi erdhe reagimin e BDI-së rreth vizitës së tij, respektivisht se kjo vizitë nuk do të ishte në të mirë të marrëdhënieve ndër-fqinjësore pas aktit të heqjes së lapidarit në Preshevë. "Kur unë mund të bisedoj me Thaçin në Bruksel, nuk e di përse reagojnë nga kjo parti të mos mund të bisedoj me mikun tim Nikolla Gurevskin, dhe popullin mik maqedonas", tha Ivica Daçiq, kryeministër i Serbisë. Dy kolegët Gruevski dhe Daçiq ndërkaq gjatë takimeve të sotme, kokë më kokë dhe në takimet plenare nënvizuan raportet e ngushta mes dy shteteve dhe gatishmërinë për thellimin akoma më shumë të marrëdhënieve politike dhe ekonomike në të ardhmen. Në këtë kuadër ata paralajmëruan edhe një mbledhje të përbashkët mes dy qeverive në muajin maj. "Dy shtetet tona edhe më tej mbeten të përkushtuara në thellimin e bashkëpunimit, për përparimin e marrëdhënieve në të gjitha nivelet, nga bashkëpunimi bilateral si dhe zhvillimin e projekteve që do të kenë ndikim në zhvillimin e ekonomisë. Shpresojmë se në këtë drejtim do të shërbejë edhe Qeveria e përbashkët të cilën e dakorduam dhe duhet të mbajmë nga mesi i këtij viti. Shpresojmë se do të jetë impuls shtesë në zhvillimin e marrëdhënieve mes dy shteteve", deklaroi Nikolla Gruevski, kryeministër i Maqedonisë. Ndërkaq kryeministri Daçiq tha se çështja e hapur mes dy kishave ortodokse dhe dallimet në çështjen e Kosovës mbeten si probleme kryesore mes dy vendeve. Për të cilën siç tha ka kërkuar nga Gruevski që të ketë qëndrim të përmbajtur përderisa vijon dialogu deri në gjetjen e një zgjidhjeje kompromisi. Semra Jakupi