ရှေးရိုးတပင်တိုင်အက - ခင်ဝင်းနွယ် (မန္တလေး)

ရှေးရိုးတပင်တိုင်အက ================= ရှေးရိုးတပင်တိုင်အကဟာ ရတနာပုံခေတ် ရွှေနန်းတော်တွင်းက ဆင်းသက်လာတဲ့ မြန်မာ့နန်းစဥ် ယဥ်ကျေးမှုအမွေအနှစ်စစ်စစ်ဖြစ်ပါတယ်။ ရွှေနန်းတော်ကြီးရဲ့ အသုံးတော်ခံကြီးများဖြစ်ကြတဲ့ အီနောင် မောင်စံတုတ်၊ ယင်းတော်မလေး၊ ဆင်ခိုးမလေး တို့မှသည် မထွေးလေး၊ မထွေးလေးမှသည် ဩဘာသောင်း စသည်ဖြင့် တပည့်သားမြေးအစဥ်အဆက် ထိန်းသိမ်းခဲ့ကြတဲ့ အဖိုးဖြတ်မရနိုင်တဲ့ ​ဒြပ်မဲ့ရတနာလို့ဆိုလျှင် မှားနိုင်ဖွယ်ရာမရှိပါဘူး။ တပင်တိုင်အကဆိုတာ ဘုရင့်သမီးတော် ပင်တိုင်စံမင်းသမီးရဲ့ စက်ရာသလွန်မှထတော်မူသည်မှစ၍ လှုပ်ရှားသွားလာမှုများကို ဟန်ယူပြီး အကအဖြစ် အသွင်ပြောင်းထားခြင်းဖြစ်တယ်လို့ဆိုပါတယ်။ ဘုရင့်သမီးတော် ပင်တိုင်စံမင်းသမီးကို ဟန်ယူရည်ညွှန်းထားတဲ့ အကဖြစ်တဲ့အတွက် ကြမ်းတမ်းသောအယူအဆ၊ အခုန်အပေါက်တို့မပါဘဲ အေးငြိမ့်ညင်သာစွာ ယဥ်ယဥ်ကျေးကျေး ကကြရတယ်လို့လည်း ဆိုပါတယ်။ စက်ရာမှထသော ပင်တိုင်စံမင်းသမီးဟာ သလွန်ညောင်းစောင်းထက်မှ တရွေ့ရွေ့ဆင်းသက်ပြီး ဦးစွာ ဘုရားဂုဏ်၊ တရားဂုဏ်၊ သံဃဂုဏ် ရည်မှန်း၍ ဘုရားကန်တော့သည်ကို ရည်ညွှန်း၍ ရှေးရိုးတပင်တိုင်အကမှာ ပထမဦးစွာ ကန်တော့ခန်းအကကို ကပြရခြင်းဖြစ်တယ်လို့ ဆိုပါတယ်။ ဘုရားကန်တော့ပြီးတဲ့နောက်မှာ ပင်တိုင်စံမင်းသမီးရဲ့ ဖြီးလိမ်းပြင်ဆင်၍ ကိုယ့်ကိုယ်ကိုယ် ရှုမြင်သည့်ဟန်များကို ရည်ညွှန်းပြီး မှန်ကြည့်၊ ဆံတော်သိမ်း စတဲ့အကတွေကို ကပြခြင်းဖြစ်ပါတယ်။ ဖြီးလိမ်းပြင်ဆင်ပြီးတဲ့အခါ ဥယျာဥ်တော်သို့ထွက်ပြီး သွားလာလှုပ်ရှားဟန်၊ ပန်းဆွတ်ဟန်၊ ပန်းစိုက်ဟန်၊ ကျောက်ကောက်ဟန် စသဖြင့် ကပြရပြီး နောက်ဆုံးမှာ ခမည်းတော် ရွှေနန်းရှင် ဘုန်းတော်ကြီးဘုရားထံ ခစား၍ ကန်တော့ဟန်ဖြင့် အဆုံးသတ်တယ်လို့ ဖတ်ရှုမှတ်သားရပါတယ်။ ခေတ်ကာလရွေ့လျောလာတာနဲ့အမျှ ယခုခေတ် ကနေကြတဲ့ ရှေးရိုးတပင်တိုင်အကတွေဟာ ရွှေနန်းတော်တွင်းက ဆင်းသက်လာတဲ့ မူရင်းတပင်တိုင်ကကွက်တွေနဲ့ များစွာ (များစွာ) ကွဲပြားပြီး ထင်တိုင်းကျဲတွေဖြစ်သွားတာကို ရင်နာစွာနဲ့ပဲ တွေ့မြင်နေရပါတယ်။ အညာရပ် ခုတင်ထိုးအငြိမ့်က သူ့အရပ်၊ သူ့ဇာတ်၊ သူ့မူသူ့ဟန်မို့ သမားစဥ်မမှန်သည်ကို ရွှေနန်းတော်တွင်းမူ အဆင့်နှင့်နှိုင်းယှဥ်ပြီး အကျယ်တဝင့်မပြောလိုသော်လည်း နိုင်ငံတော်မူလို့ပြဌာန်းထားတဲ့ ရှေးရိုးတပင်တိုင်အကထဲမှာကို လွဲမှားမှုတွေရှိနေတာ ဖြစ်ပါတယ်။ အခုမြင်တွေ့နေရတဲ့ နိုင်ငံတော်မူ တပင်တိုင်နဲ့ ခုတင်ထိုးအငြိမ့် တပင်တိုင်မှာ မှန်တော်ရှု ဆိုတဲ့ကကွက်ကို အားလုံးသိကြမယ်ထင်ပါတယ်။ လက်ဖဝါးတစ်ဖက်ကို မျက်နှာဘက်လှည့်ဖြန့်ပြီး ခေါင်းကလေးဟိုဘက်ဒီဘက်ငှဲ့လို့ မှန်ဝိုင်းကလေးကိုကြည့်တဲ့ဟန် ကကြတာဖြစ်ပါတယ်။ ခုတင်ထိုးမူမှာဆို မှန်ကြည့်တဲ့အပြင် မျက်နှာကိုတို့ဖက်နှင့်ပုတ်ဟန်၊ လက်ကိုနှုတ်ခမ်းနဲ့ကိုက်ပြီး မျက်လုံးတစ်ဖက်မှိတ်တဲ့ဟန်တွေပါ ကပြကြတာ သိကြမှာဖြစ်ပါတယ်။ ဒါတွေဟာ ရွှေနန်းတော်ကဆင်းသက်လာတဲ့ ပင်တိုင်စံမင်းသမီးရဲ့ဟန်နဲ့ လားလားမှမသက်ဆိုင်တဲ့ အရပ်သူ မှန်ကြည့်ဟန်၊ အလှပြင်ဟန်များပဲ ဖြစ်ပါတယ်။ ဒီကကွက်နဲ့ပတ်သက်ပြီး ကျွန်တော့်ကို အမေ ပန်တျာ ဌေးဌေးမြင့် ပြောပြခဲ့တာလေးရှိပါတယ်။ " ရှေးရိုးတပင်တိုင်အကထဲမှာ မှန်တော်ရှုဆိုတဲ့အက မရှိဘူး ငါ့သားရဲ့... မှန်ကြည့် ဆိုတဲ့အကပဲရှိတယ်... ဟိုတုန်းက နန်းတော်ထဲမှာ မင်းသမီးတွေက မှန်ကြည့်ရင် ကိုယ်လုံးပေါ်မှန်ကြီးတွေနဲ့ကြည့်တာ... ဒါကြောင့် နန်းတွင်းက ဆင်းသက်တဲ့ ရှေးရိုးတပင်တိုင်မှာ တစ်ကိုယ်လုံးပေါ်အောင်ကြည့်တဲ့ဟန်နဲ့ မှန်ကြည့် ဆိုတဲ့အကပဲရှိတယ်... (အမေက ဟန်လေးတောင်လုပ်ပြခဲ့ပါသေးတယ်) မှန်တော်ရှု ဆိုတာ မင်းသားအကမှာပဲရှိတယ်... ခေါင်းပေါင်းပေါင်းပြီး မှန်ကြည့်တဲ့ဟန်ကို ယူကတာ... ဗောင်းတော်ပြင်... မှန်တင်တော်ရှုတဲ့ (အမေက ဟန်လေးခင်းပြပြန်ပါသေးတယ်) " ဒါကတော့ ကျွန်တော်တို့အမေ ပန်တျာ ဒေါ်ဌေးဌေးမြင့် ထံက နာယူမှတ်သားခဲ့ရတဲ့ မှန်ကြည့်အကနဲ့ ပတ်သက်တဲ့ မှတ်သားစရာလေးဖြစ်ပါတယ်။ အခု ကျွန်တော်တင်ပြထားတဲ့မှတ်တမ်းမှာလည်း ရှေးရိုးတပင်တိုင်အကကို ရွှေနန်းတော်ကဆင်းသက်လာတဲ့ မူမှန်၊ သမားစဥ်မှန်အတိုင်း အကရော၊ အတီးရော ရှုစားကြရမှာဖြစ်ပါတယ်။ အခုတင်ပြထားတဲ့ ရှေးရိုးတပင်တိုင်ကကွက်တွေဟာ နန်းတွင်းမင်းသမီး မထွေးလေးမှတစ်ဆင့် တပည့်ဖြစ်သူ ဝဏ္ဏကျော်ထင် ဒေါ်ဩဘာသောင်းထံကို ဆင်းသက်လာတဲ့ နန်းတွင်းမူမှန် တပင်တိုင်ကကွက်များပဲ ဖြစ်ပါတယ်။ ဒီကကွက်တွေကို အမေ ဒေါ်ဩဘာသောင်းရဲ့ အိတ်သွန်ဖာမှောက် ပညာအမွေရခဲ့တဲ့ အကပညာရှင် အမေ ခင်ဝင်းနွယ်က သမားစဥ်ကုန်ကပြထားတာဖြစ်ပါတယ်။ အတီးကလည်း ကြားနေကျ တပင်တိုင်တီးလုံး မဟုတ်ပါဘူး။ နေမျိုးဗလကျော်သူ ရွာစားကြီးစိန်ဗေဒါတီးခဲ့တဲ့ ရွှေနန်းတွင်းမူအတိုင်း ယိုးဒယားတီးကွက်များ၊ ဖျဥ်းချင်၊ ဖျဥ်းဖျတ်ဖျတ်၊ ရေလယ်စိမ်၊ သံချပ်၊ သံဆန်းတီးလုံးများကို ရွာစားကြီး စိန်တင့်လွင်နဲ့ မြို့မတူရိယာအသင်းကြီးက မြိုင်မြိုင်ဆိုင်ဆိုင် သမားစဥ်ကုန် တီးခတ်ထားတဲ့အတွက် မြန်မာတစ်နိုင်ငံလုံး ဘယ်နေရာမှာရှာရှာမရနိုင်တဲ့ မိနစ်နှစ်ဆယ်နီးပါးကြာတဲ့ ရွှေနန်းတွင်းမူ ရှေးရိုးတပင်တိုင်စစ်စစ်ကို အီဆိမ့်နေအောင် ရှုစားကြရမှာဖြစ်ပါတယ်။ တင်ပြထားတဲ့မှတ်တမ်းထဲမှာ ကကွက်တစ်ခုချင်းစီရဲ့ နာမည်တွေကိုဖော်ပြပေးထားပါတယ်။ တစ်ဖက်ပန်းစိုက်နှင့် နှစ်ဖက်ပန်းစိုက် ကကွက်နှစ်ခုကလွဲလို့ ယိုးဒယားကန်တော့ခန်းကကွက်စုံကို ဟန်ကြီးခင်းလို့ ယဥ်သာငြိမ့်ညောင်းစွာ ကပြထားတဲ့ တကယ့်အဆီအနှစ်မှတ်တမ်းတစ်ခုဖြစ်တာကြောင့် မြတ်နိုးတန်ဖိုးထားစွာ တင်ပြလိုက်ရပါတယ်။ နားဆင် ရှုစားအားပေးတော်မူကြပါဦး ခင်ဗျာ။ ကိုးကား - ဆရာ ဆူးငှက် (သူတို့အိမ်) ပန်တျာ မြင့်အောင် (မြန်မာ့အကသမိုင်း) Admin Khant #မြန်မာ့အငြိမ့်သဘင် Original video source: Alinkar Mandalay