يابري حالي || مرثية الشاعر يحيى بن فالح السريحة الاحمري || في زوجته نوره - اداء المنشد هزاع المهلكي

قالوا تزوج قلت ماني بمجنون من يطلع من الجنه يطيح بالنار حتى لو ان معها في البنك مليون ورصيد ابوها الشيخ من فوق مليار ان ما ادور مال وانساب وعيون انا بعيد شبوح وغريّب افكار انا فقدت اللي لها يرخص الكون ولاارخص غلاها الموت قصاف الاعمار عاشت معي وانا معنّى ومديون وصكت على عيوبي من العالم ستار عشنا على بساط الرضا اللي يقولون على الحلا مر ،، وعلى المُرّه امرار ولا قاموا اللي على المعازف يميلون قامت تصلي الوتر في وقت الاسحار ولااستانسوا اللي مع عبادي يغنون قامت تونس ،،، بين ترتيل واذكار ولاهي من اللي فالمقاهي يهيمون لاصدعت زادت مع الهيل مسمار ام الحياء والصبر في شده وهون واللبس حشمه ثوب وجلال وخمار وجدي عليها وجد مالا تعرفون راحت وخلتنا ،،، يتاما وقصار يابري حالي وااه واخييه ،،، تكفون راحت سعود البيت والضيف والجار اي والله ابكي والرجاجيل يبكون ومن حر فرقها غدى صدري وجار عشرين عام من العمر ماهي تهون الا على الهيّن ،،، وانا والله مجار ماعقب نوره نور واشلون واشلون والروح راحت وانطفت شمعة الدار خلوني اقضي العمر صابر ومغبون واعيش حزن فرقها ،،، سر وجهار اعشق معاناتي وشاكر وممنون والحمد للي يعرف الزين واختار اختار نوره وارخص بعيني الكون ومشكاي لله في تفاصيل ماصار فيالله ياللي لك عبادك يحجون تجعل جزاها جنتك ذات الانهار واجبر مصابي وامرك بكافٍ ونون واعتق رقبتي ووالديني من النار