MPINA ATOA KAULI HII BAADA YA MAHAKAMA KUPANGA SIKU YA HUKUMU

Mwanachama wa Chama cha ACT-Wazalendo, Luhaga Mpina amesema anatamani hukumu ya kesi yake ya kutaka kurejeshwa kwenye orodha ya wagombea urais itolewe haraka iwezekanavyo, hata kama ni kesho, ili apate nafasi ya kuwaeleza Watanzania kwa nini anataka nafasi hiyo. Mpina ambaye pia ni Mbunge wa zamani wa Jimbo la Kisesa, ametoa kauli hiyo leo Jumatatu, Oktoba 6, 2025, nje ya Mahakama Kuu jijini Dar es Salaam mara baada ya kuahirishwa kwa shauri hilo. “Wenzetu wanaendelea na kampeni, sisi tunaendelea na mahakama kusema kweli natamani sana kama ingependeza hukumu hii itoke hata kesho na waseme kuwa ninakwenda kugombea ili kusudi nikawaambie kwa nini nataka nafasi hiyo. Uchache wa siku siyo hoja,” amesema Mpina. Mpina alifungua kesi hiyo kupinga uamuzi wa Tume ya Taifa ya Uchaguzi (NEC) wa kumwondoa katika orodha ya wagombea urais kupitia ACT-Wazalendo, akitaka mahakama imuagize arudishwe katika nafasi hiyo.