ඓතිහාසික සගම රජ මහ විහාරීය වාර්ෂික දංකත් මාරුව සහ බුදු මඟුල් පෙරහැර - 2026

ඓතිහාසික සගම රජමහ විහාරය කේන්ද්‍ර කොට වාර්ෂිකව පැවැත්වෙන කිරිබඩ පාත්‍ර පූජාව සඳහා හම්බා කෙටීමේ මංගල්‍යය සහ දන්කත් මාරු කිරීමේ පෙරහැර සගම හා බූටාවත්ත ගම්මාන කේන්ද්‍ර කොට ඉකුත්දා පැවැත්විණි. කන්නයක අස්වනු නෙළා සිය නැවුම් අස්වැන්න සගම රජ මහ විහාරයේදී බුදු රජාණන් වහන්සේට සහ සුමන සමන් දිව්‍ය රාජයාට පූජා කිරීම වෙනුවෙන් මෙම කිරිබඩ පාත්‍ර පූජාව සෑම වර්ෂයකම සිංහල හින්දු අලුත් අවුරුද්ද අවසානයේදී සිදු කරති. ඒ සඳහා වී කෙටීම හම්බා කෙටීමේ මංගල්‍ය ලෙස හැදින් වෙන අතර එය සගම ධර්ම ශාලාවේදී ආරම්භ විය. පිරිමි පාර්ශවය පමණක් වී කෙටීම සඳහා සහාගීවන අතර එයද මුල් පවුල් 09ක වර්තමාන පාරම්පරාව විසින් සිදුකරන සිරිතකි. මෙම ගම්මානයේ වැඩි පිරිසක් එම පවුල් 09හි වත්මන් සාමාජිකයෝ වෙති. පිරිමි පාර්ශවය වී කෙටීමෙන් පසු එම නැවුම් සහල් භාවිත කොට දන් සකස් කිරීම සිදුවේ. කපුලියද්ද, ගොඩමුන්න, නුගලියද්ද සහ බූටාවත්ත යන ගම්මානවල ජනතාව විසින් මෙම චාරිත්‍රය පුරාතනයේ සිට සිදු කරන අතර අද දිනයේදී නුගලියද්ද සහ බූටාවත්ත ගම්වාසීන්ගේ සංවිධානත්වයෙන් මත මෙම දන්කත් මාරු පෙරහැර සංවිධාන කොට තිබිණි. අලි ඇතුන්ගෙන් සමන්විත එම පෙරහැර සගම ධර්ම ශාලාවේ සිට ආරම්භ වී සගම රජ මහ විහාරය, බූටාවත්ත, මුදුනකඩේ, කපුලියද්ද යන ප්‍රදේශ ඔස්සේ ගමන් ගැනීම සිදුවිය. විහාර අස්නේ පළමු රජමහ විහාරය වන සගම රජමහා විහාරය කේන්ද්‍ර කොට සෑම වර්ෂයකදීම පැවැත්වෙන මෙම පූජාව මෙරට පළමු වාර්ෂික පෙරහැර මංගල්‍යය ද වේ. කිරිබඩ පාත්‍ර පූජාවෙන් මෙවර වාර්ෂික පූජාව අවසන් වන අතර ඉදිරි වර්ෂයේ සිංහල අලුත් අවුරුද්ද අවසන් වී දින 03කට පසු මීළග කිරිබඩ පාත්‍ර පූජාව ආරම්භවීමට නියමිතය.