ហេដ្ឋារចនាសម្ព័ន្ធជាមរតករបស់សម្តេចតេជោ ហ៊ុន សែន ជាច្រើន បានរំលេចខ្លួនលើទឹកដីខេត្តក្រចេះ

ហេដ្ឋារចនាសម្ព័ន្ធជាមរតករបស់សម្តេចតេជោ ហ៊ុន សែន ជាច្រើន បានរំលេចខ្លួនលើទឹកដីខេត្តក្រចេះ (ក្រចេះ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា មុននឹងដាក់ចុះតំណែងជា​នាយក​រដ្ឋមន្ត្រីកាលពីឆ្នាំ២០២៣ សម្តេចបានបន្សល់ទុកនូវចំណងដៃសមិទ្ធផលហេដ្ឋារចនាសម្ព័ន្ធ​ជាច្រើនសម្រាប់ប្រជាពលរដ្ឋខេត្តក្រចេះ។ មកដល់ពេលបច្ចុប្បន្ននេះ សមិទ្ធទាំងឡាយដែលជាចំណងដៃដ៏ពិសិដ្ឋរបស់សម្តេចតេជោ សម្រាប់​អ្នកខេត្តក្រចេះ ត្រូវបានសាងសង់រួចរាល់ជាស្ថាពរហើយ។ សមិទ្ធផលទាំងនោះ មាន​ដូចជា៖ ស្ពានមិត្តភាពកម្ពុជា-ចិន ប្រវែង ១.៧៦១ម៉ែត្រ តភ្ជាប់ពីស្រុកចិត្របុរី ទៅស្រុក​ព្រែក​ប្រសព្វ និងផ្លូវតភ្ជាប់ប្រវែង ៣១,៦៩គីឡូម៉ែត្រ, ជួសជុល និងពង្រីក និងលើកកម្រិតស្ថាន​ភាព​ផ្លូវកៅស៊ូ DBST ទៅជាផ្លូវកៅស៊ូAC ចំនួន ៣ខ្សែ សរុបប្រវែង ១៤១,១គីឡូម៉ែត្រ រួមមាន៖ ផ្លូវ​ជាតិលេខ៧ ពីព្រំប្រទល់ស្រុកមេមត់ ខេត្តត្បូងឃ្មុំ រហូតដល់រង្វង់មូលខ្លាស្ទុះ ក្រុងក្រចេះ​ប្រវែង ៩២គីឡូម៉ែត្រ, ផ្លូវជាតិលេខ៣៧៧ ក្រចេះ-សំបូរ ប្រវែង ៣៥,៥គីឡូម៉ែត្រ និងផ្លូវជាតិ​លេខ​៣៧៧A សណ្ដាន់ ឆ្ពោះទៅផ្លូវជាតិលេខ៧ ប្រវែង ១៣,៦គីឡូម៉ែត្រ។ ក្រៅពីនោះ ក៏មានការកែលំអផ្លូវក្នុងក្រុងក្រចេះចាប់ពីរង្វង់មូលប្រៀបស ដល់រង្វង់មូលខ្លាស្ទុះជា​៤គន្លង រៀបចំសួនលើទ្រូងផ្លូវ ព្រមទាំងបំពាក់ភ្លើងសឡា។ តាមរយៈសមិទ្ធផលដ៏លិចធ្លោទាំងនេះ បានប្រែក្លាយទឹកដីខេត្តក្រចេះឱ្យកាន់តែស្រស់បំព្រង និង​បានរួមចំណែកដល់ការតភ្ជាប់ផ្ទៃក្នុងខេត្ត ព្រមទាំងសម្រួលដល់ការធ្វើដំណើរ និងការដឹកជញ្ជូនរបស់ប្រជាពលរដ្ឋ។ ពលរដ្ឋខេត្តក្រចេះ បានបង្ហាញការពេញចិត្ត និងរីករាយឥតឧបមាចំពោះមរតកដ៏វិសេស​វិសាល ដែលសម្តេចតេជោ ហ៊ុន សែន បានបន្សល់ទុកជាចំណងដៃ។ អ្នកខេត្តក្រចេះ បាន​គោរពថ្លែងអំណរគុណ ដឹង និងចងចាំគុណបំណាច់របស់សម្តេចតេជោ ដែលបានគិតគូរពីសុខ​ទុក្ខរបស់ពលរដ្ឋខេត្តក្រចេះ ហើយសាងសង់សមិទ្ធផលទាំងអស់នេះ​ឡើង រួមចំណែកដោះ​ស្រាយ​ការលំបាកក្នុងជីវភាពប្រចាំថ្ងៃ៕