Իմ համայնքը՝ Գոգհովիտ

Գոգհովիտ բնակավայրի մասին պատմող տեսահոլովակը ներառում է մեկ ամբողջական օր` առավոտից մինչ երեկո։ Երիտասարդական ակտիվ խմբի մասնակիցներից մեկը տեսահոլովակի ընթացքում ներկայացնում է գյուղի անվան պատմությունը, վարք ու բարքը, ավանդույթներն ու նշանավոր վայրերը։ Տեսահոլովակի մեջ Գոգհովիտի բնակիչներից երկուսը գյուղի բարբառով խոսում են իրենց աշխատանքից ու առօրյայից և թե ինչու արժե գալ Գոգհովիտ բնակավայր։ Բնակավայրն ունի շատ գեղեցիկ բնություն՝ խնձորենիների այգիները, գետակն իր հարակից տարածքով և այլն, որոնք ներկայացվում են տեսանյութում։ Տեսահոլովակը սկսվում է առավոտ ծեգին գյուղ մտնող տեսարանի պատկերով։ Այն ներառում է անասունների առավոտյան արոտ գնալը, ոչխարների հոտը, մեղուների փեթակներն ու մեղվապահների կատարած աշխատանքը, կաթի մշակումը, թոնրով հաց թխելը։ Քանի որ այժմ բնակավայրի եկեղեցին բարերարների կողմից վերակառուցվում է, նկարահանվել են նաև շինարարական աշխատանքները՝ զուգահեռ ներկայացնելով եկեղեցու պատմությունը։ Կան դրվագներ՝ գյուղում կառուցված փոքրիկ մատուռներից։ Տեսահոլովակում ընդգրկվել են նաև սեփական փոքր բիզնես ունեցողները՝ հացի, կարի և կահույքի։ Գյուղն ունի մշակույթի տուն, դպրոց, նախակրթարան որոնց նույնպես անդրադարձել ենք։ Տեսանյութը պատրաստվել է "Կանայք հանուն զարգացման" ՀԿ շահառու Գոգհովիտ համայնքի երիտասարդական ակտիվ խմբի կողմից՝ "Իմ համայնքը" խորագրով տեսանյութերի մրցույթի շրջանակներում։