AFANDE KURADUPAGASE: UMUHUNGU WE NI 2nd Lt MURI RDF YIZE Royal Military Academy Sandhurst 👍

Abasirikare b’inzirabwoba natwe twari dufite ingengabitekerezo ko umwanzi wacu ari Umututsi – ACP Augustin Kuradupagase ACP Kuradupagase Augustin, uzwi ku izina rya Jarudi, wahoze mu Ngabo za FAR, ubu akaba ari muri Polisi y’u Rwanda, yavuze ko ingengabitekerezo yabarangaga icyo gihe yari ishingiye ku kwemera ko Umututsi wese ari umwanzi wabo. Urugendo rwe rwo kuva mu mitwe yitwaje intwaro akaza kwisanga mu Ngabo z’u Rwanda (RDF), ndetse nyuma agakomereza muri Polisi y’igihugu avuga ko arukesha ubuyobozi bwiza bwa RPF Inkotanyi, bwamuhinduye imyumvire agafatanya n’abandi kubaka igihugu. Kuradupagase yavutse mu kwezi k’Ukuboza 1968, mu cyahoze ari Komini Karago, muri Gisenyi, aho uwahoze ari Perezida w’u Rwanda, Juvénal Habyarimana, yakomokaga. Amashuri yisumbuye yayize muri G.S. de La Salle Byumba, ariko kubera ko yakomokaga aho Perezida Habyarimana yavukaga, ngo byari ihame ko ajya kwiga mu Ishuri Rikuru rya Gisirikare, ESM (École Supérieure Militaire). Ati: "Jyewe byari ihame ko njya muri iryo shuri bitewe n’aho nakomokaga. Tariki ya 2 Nzeri 1991 nahise ntangira amasomo ya gisirikare gusa, kubera ko urugamba rwari rukomeye. Twagombaga kwiga amasomo ya gisirikare gusa, andi akazaza nyuma." ACP Kuradupagase avuga ko mu gihe cy’umwaka yamaze ahabwa ayo masomo, hari amezi abiri yigishijwe n’abasirikare b’Abafaransa bari mu itsinda ry’Ubufasha bwa Gisirikare n’Amahugurwa (DAMI).